Mugara goMuisraeli gedina Elikana kwa kwere masupareko, Hana naPenina, nye Hana yige ga here po unene. Penina nga zoro Hana morwa kapi ga kere novanona, nye Penina kwa kere novana wovanzi. Nkenye mvhura, Elikana nga zi nepata lyendi konkongoronzugo moSiro va ka karere Jehova. Sikando simwe apa va kere koSiro, Elikana ta mono asi Hana ana guwu. Ta mu tantere asi: ‘Hana, wa ha lira. Ame kwa ku hara unene.’

Hana ta zi a ka kanderere. Age kwa kanderere kwaJehova oku kuna kulira. Ta tumbwidire Jehova asi: ‘Nsene ngo pa nge munona gomugara ngani mu ku pa ntani nga ku karera eparu lyendi nalinye.’

Mupristeli gomunene Eli, apa ga mwene asi Hana kuna kuuyunga gelike, age kwa gazarere asi ana korwa. Hana ta limburura asi: ‘Tate, kapi nina korwa. Nina kara noudigu, ntani kuna kuutantera Jehova.’ Eli ta dimburura asi mepuko ana kara, ta tantere Hana asi: ‘Karunga ngano ta ku pe eyi ono hundire.’ Hana kapi ga guvire hena. Kapi pwa pitire mvhura, makura Hana ta hampuruka mukeke gomumati ta mu ruku Samwere. Hana ga hefe, ndi ngapi?

 Hana kapi ga divarere etumbwidiro lyendi kwaJehova. Apa Samwere ga hagekere kuzamwa, ozina tava mu twara a ka karere Jehova konkongoronzugo. Ta tantere Eli asi: ‘Ogu yige munona na hundilire kwaJehova. Age nga karera Jehova eparu lyendi nalinye.’ Nkenye mvhura Hana naElikana ngava dingura Samwere nokumutwarera yikoverero yoyipe. Jehova kwa tungikire Hana a kare novanona wovamati vatatu, ano wovakadona vavali.