Mwine Isalela umo witwa bu Elekana, wādi na bakaji babidi, ba Hana ne Penina, inoko Elekana wādi usenswe Hana bininge. Penina wādi usepa Ana kitatyi kyonso mwanda Hana kādipo ubutula, ino aye wādi na bana bavule. Mwaka ne mwaka, Elekana wādi usela kisaka kyandi mwanda wa kukatōta ku kipema mu Shilo. Kitatyi kimo pobādi ku kipema, Elekana wājingulula’mba Hana, muswedibwe wandi udi na bulanda bininge. Wāmunena’mba: ‘Hana, nakwisāshila kokidila. Udi nami. Nkusenswe.’

Kupwa, Hana wāenda pa bunka kālombela. Wādi udila’nka kudila paādi uzenza Yehova amukwashe. Wāmulaya’mba: ‘Yehova, shi umpe mwana mwana-mulume, nkakupa’ye, kadi ukakwingidila mu būmi bwandi bonso.’

Edi, Kitobo Mukatampe pa kumona Hana wifinwina, wālanga’mba i mukolwe. Hana wānena’mba: ‘Aa, a mfumwami, nkikolelwepo. Ndi na makambakano makatampe, o ano onombola Yehova.’ Edi wājingulula’mba waluba, wāsapwila Hana amba: ‘Leza akupe byosaka.’ Hana wēivwana biyampe, wātaluka kaenda. Ne mwaka mwine kewabwene, wābutula mwana  mwana-mulume, wāmwinika bu Samwele. Mwene Hana ye uno wāsangele bininge?

Hana kāidilwepo mulao waālaile Yehova. Aye’tu ulekesha Samwele, wākamutwala akengidile ku kipema. Wāsapwila Edi amba: ‘Uno ye mwana onadi nomba’wa. Namupāna kudi Yehova, amwingidile mafuku onso.’ Ba Elekana ne Hana bādi bakapempula Samwele mwaka ne mwaka, ne kumuselela kotyi mupya wampikwa maboko. Yehova wāpēle Hana bana bakwabo basatu bana-balume ne bana babidi bana-bakaji.