Umwina Izlaeli uwi zina ilyakuti Elikana wakweti anaci yaili, Hana na Penina, nomba watemwisizye Hana. Lyonsi Penina watumfyanga Hana pa mulandu wakuti Hana ataakweti umwana lelo Penina wene wakweti ana aingi. Cila mwaka, Elikana wasendanga ulupwa lwakwe ku Syilo kuno yayanga mu kupepa Yeova pi tenti lya kupepelapo. Pa nsita imwi lino yaali kuuku, Elikana waweni ukuti Hana umutemwikwa wakwe ali sana nu ulanda. Watile: ‘Hana utaalila. Uli nani. Ne muno nakutemwa.’

Pa cisila, Hana waile umu kupepa. Wapaapasile kuli Yeova ala akulila. Nupya walavile ukuti: ‘Yeova, ndi cakuti wampeela umwana umonsi, ndamupeela kuli wewe, nupya alakuombela umi wakwe onsi.’

Lino Eli, Simapepo Mukalamba waweni Hana akupepa ala akulila, welenginye ukuti watakoleka. Hana waswike ati: ‘Awe musambazi, ntakolike. Ninkwata intazi iikulu, nupya nkulenga ukuti Yeova angazwe.’ Lino Eli wamanyile ukuti aataluvyanya pa kuneena Hana ukuti watakoleka, wamunenyile ati: ‘Si Leza akupeele vino ukumulenga.’ Hana uvwile ningo nupya wapisile. Lino patatala papita  umwaka, Hana wakweti umwana umonsi nupya wamwinike ati Samueli. Uzye vwile ukwelenganya ukuti Hana uvwile uli?

Hana atiilile vino walavile Yeova. Lino Samueli watiile sile ukonka, wamutwazile ukuti aakaomba pi tenti lya kupepelapo. Waneenyile Eli ati: ‘Wii aali mwana uno napepelangapo. Fwandi namupeela kuli Yeova, umi wakwe onsi.’ Cila mwaka, Elikana na Hana yatandalilanga Samueli nupya yamutwalilanga icakuzwala caula makasa. Pa cisila, Yeova wapeezile Hana ana aonsi yatatu na anaci yaili.