Ta̱ Elcaná ta̱ ñuu Israel ni̱xi̱yora ta ni̱xi̱yo u̱vi̱ ná síʼíra: ñá Ana xíʼin ñá Peniná. Soo kúʼvi̱ka-inira xínira ñá Ana. Ku̱a̱ʼání se̱ʼe ñá Peniná, soo ñá Ana kǒo se̱ʼeñá. Ta xa̱ʼa ña̱yóʼo ñá Peniná xi̱kusi̱kindaañá ñá Ana. Ndiʼi ku̱i̱ya̱ ta̱ Elcaná xáʼa̱nra xíʼin na̱ veʼera chí Siló nu̱ú íyo tabernáculo ña̱ ndasakáʼnuna Jehová. Iin ki̱vi̱ tá ni̱xa̱ʼa̱nna kán ta̱ Elcaná xi̱nira ña̱ kúsuchíní-ini ñá Ana. Ta ni̱ka̱ʼa̱nra xíʼinñá: “Va̱ása kuakún Ana. Yóʼo íyoi̱ xíʼún, ta kúni̱níi̱ xínii̱ yóʼó”.

Tándi̱ʼi, ñá Ana ki̱tañá ku̱a̱ʼa̱nñá ña̱ ka̱ʼa̱nñá xíʼin Ndióxi̱. Xákukavíñá ta ni̱ka̱ʼa̱n ndáʼviñá xíʼin Jehová, ta ka̱chiñá: “Jehová tá ná taxiún koo iin se̱ʼi̱, taxii̱ra ndaʼún ña̱ kachíñura nu̱ún”.

Ta̱ su̱tu̱ káʼnu Elí xi̱nira ña̱ xákuní ñá Ana ta kánda̱ yuʼúñá soo kǒo táku̱ ña̱ káʼa̱nñá, ta nda̱kanixi̱níra ñá xíʼi kúúñá. Ñá Ana ni̱ka̱ʼa̱nñá xíʼinra: “Su̱ví ñá xíʼi kúi̱ táta. Xíʼin Jehová káʼi̱n chi iin tu̱ndóʼo káʼnu kúúmiíi̱”. Tasaá na̱kunda̱a̱-ini ta̱ Eli ña̱ va̱ása va̱ʼa ña̱ nda̱kanixi̱níra xa̱ʼañá ta ni̱ka̱ʼa̱nra: “Jehová ná taxi ndiʼi ña̱ ndúkún”. Va̱ʼakaví kúni ñá Ana ta ki̱tañá ku̱a̱ʼa̱nñá. Tá kúma̱níka xi̱nu iin ku̱i̱ya̱ ka̱ku iin se̱ʼeñá ta̱ xi̱naní Samuel. Ni̱kusi̱íkaví iniñá.

 Ñá Ana kǒo nínandósóñá ña̱ ni̱ka̱ʼa̱nñá xíʼin Jehová. Xa̱ʼa ña̱yóʼo tá xa̱a̱ káʼnu ta̱ Samual ni̱xa̱ʼa̱nñá nda̱kooñára tabernáculo. Ta ni̱ka̱ʼa̱nñá xíʼin ta̱ Elí: “Ni̱ka̱ʼi̱n xíʼin Jehová ña̱ taxira iin ta̱ loʼo se̱ʼi̱. Ta vitin táxii̱ra ndaʼa̱ Jehová ña̱ kachíñura nu̱úra”. Ta̱ Elcaná xíʼin ñá Ana ndiʼi ku̱i̱ya̱ xáʼa̱nna xítona ta̱ Samuel ta níʼina iin ti̱ko̱to̱ ña̱ kǒo ndaʼa̱ kundixira. Ni̱ya̱ʼa tiempo Jehová chi̱ndeéra ñá Ana ta ka̱kuka u̱ni̱ ta̱a xíʼin u̱vi̱ ñaʼá se̱ʼeñá.