THUTO 35
Hanna o Rapela Jehofa Gore a mo Nee Morwa
Go be go na le monna yo mongwe wa Moisiraele yo a bitšwago Elikana. Monna yoo o be a na le basadi ba babedi e lego Hanna le Penina, eupša o be a rata Hanna kudu. Ka ge Penina a be a na le bana ba bantši, ka mehla o be a kwera Hanna ka gobane Hanna o be a se na bana. Ngwaga o mongwe le o mongwe, Elikana o be a eya le lapa la gagwe go yo rapela Jehofa taberenakeleng kua Shilo. Ka letšatši le lengwe ge ba le moo, Elikana o ile a bona gore mosadi wa gagwe e lego Hanna o nyamile kudu. Ke moka a re go yena: ‘Hanna, hle o se ke wa lla. Ke a go rata mogatšaka.’
Ka morago, Hanna o ile a tloga a nnoši a yo rapela Jehofa. O be a lla ge a dutše a rapela Jehofa gore a mo thuše. O ile a tshepiša Jehofa a re: ‘Jehofa, ge o ka nnea morwa, ke tlo go nea yena, gomme o tla go šomela bophelo bja gagwe ka moka.’
Moperisita yo a Phagamego e lego Eli o ile a bona Hanna a lla, gomme a re o tagilwe. Hanna o ile a re: ‘Aowa mong wa ka, ga se ka tagwa. Ke na le bothata bjo bogolo, gomme ke botša Jehofa ka bjona.’ Eli o ile a bona gore o kgopišitše Hanna, gomme a re go yena: ‘Eka Modimo a ka go nea seo o se nyakago.’ Hanna o ile a ikwa a le kaone, ke moka a tloga. Pele go fela ngwaga, o ile a ba le ngwana wa mošemane gomme a mo rea leina a re ke Samuele. Nagana kamoo Hanna a bego a thabile ka gona!
Hanna ga se a ka a lebala seo a bego a se tshepišitše Jehofa. Gateetee ge Samuele a tshwele letswele, Hanna o ile a mo iša taberenakeleng gore a yo šomela Jehofa. O ile a botša Eli a re: ‘Letšatši lela ge ke be ke rapela, ke be ke kgopela Jehofa gore a mphe mošemane yo. Ka gona, ga bjale ke mo nea Jehofa.’ Ngwaga o mongwe le o mongwe, Elikana le Hanna ba be ba etela Samuele taberenakeleng gomme ba mo tlela le seaparo se seswa sa go hloka matsogo. Jehofa o ile a dira gore Hanna a be le barwa ba bangwe ba bararo le barwedi ba babedi.
“Tšwelang pele le kgopela, le tla newa; tšwelang pele le tsoma, le tla hwetša.”—Mateo 7:7
You May Also Like
EKIŠA TUMELO YA BONA
Hanna o Ile a Bulela Modimo Pelo ya Gagwe ka Thapelo
Tumelo ya Hanna go Jehofa e ile ya mo thuša go lebeletšana le boemo bjo go bego go bonagala eka a ka se kgone go lebeletšana le bjona.
GO ITHUTA KA DISWANTŠHO
Hanna o Thušitše Samuele go Hlankela Jehofa
Mošomo wo o tla thuša bana ba mengwaga ya magareng ga e 3 le e 6 go ithuta ka mpho yeo Hanna a bego a e nea Samuele ngwaga o mongwe le o mongwe.
MEŠOMO YA GO ITHUTA YA BANA
O tla Kgothatša Mang?
Mošomo wo o thuša bana ba mengwaga e 8 go ya go e 12 go ithuta go kgothatša motho yo mongwe.
