Elkéínah beʼasdzą́ą́ naaki, łaʼ Hánnah wolyé, łaʼígíí éí Piinínah wolyé, ákondi Hánnah éí aláahdi ayóóʼáyóʼní. Hánnah haʼáłchíní ádinígíí biniinaa Piinínah áłahjįʼ hwéʼétsʼih. Tʼáá nináháhááh bikʼeh haghan hazʼą́ą́dóó bił, Sháílohdi tabernaclegi Jiihóvah dazhdósin biniyé ałnáájíkah. Łah, áadi nijikaigo Elkéínah éí Hánnah yínííł nilı̨́įgo baa ákozhniizı̨́ı̨́ʼ. Elkéínah ájíní: ‘Tʼáadoo nichaaí, Hánnah. Nił honishłǫ́ áádóó ayóóʼánííníshʼní.’

Hánnah jichago Jiihóvah níjookąąhgo sozdoolzin. Ájíní: ‘Jiihóvah, shiyáázh hazlı̨́įʼgo naa deeshtééł. Beʼiinaʼ ninítʼiʼjįʼ ná naalʼaʼ doo.’

Aláahdi Nááʼiiłniihii Íílai éí Hánnah bitah hoditłidgo yichago jiiłtsą́, áko bił honeezdo daatsʼí jinízin. Hánnah ájíní: ‘Shibóhólníihii, doo shił honeezdo da. Tʼáá íiyisíí yeeʼ shichʼįʼ anáhóótʼiʼgo Jiihóvah bee bił hashneʼ.’ Díí baa ákozhniizı̨́įʼgo Íílai ájíní: ‘Bíká sodílzinígíí shı̨́ı̨́ God ná yiʼdoolííł.’ Tʼáadoo náháhí Hánnah ashkii jishchı̨́įgo Sámuel bee jíízhiʼ. Hánnah tʼáá íiyisíí hoł hózhǫǫd.

Hánnah éí Jiihóvah hayáázh baazhníłtı̨́ yę́ę doo baa jiyooznah da.  Sámuel iʼdíítʼóodgo, tabernacledi naalʼaʼ doo biniyé ákǫ́ǫ́ bił jiníʼáázh. Íílai ábijiní: ‘Díí ashkii bíká sodeeszin yę́ę átʼı̨́. Jiihóvah yá naalʼaʼgo bíyoołkáał doo.’ Elkéínah dóó Hánnah éí tʼáá nináháhááh bikʼeh Sámuel éétsoh bá áńjiilʼįįh áádóó tabernacledi baa níjítʼash ńtʼééʼ. Hánnah éí ashiiké táaʼgo dóó atʼééké naakigo Jiihóvah yee hakʼijisdliʼ.