Elcaná israelita runaca ishqui huarmicunatami charirca. Shujca Ana caishujca Peniná shutimi carca. Pero Anatami yalli cꞌuyarca. Peninaca achca huahuacunatami charirca. Anaca mana huahuata charircachu. Chaimantami paica Anataca chanzata ruraj carca. Cada huatami Elcanaca paipaj familiandij Diospaj carpa huasipi Jehovata adorangapaj Siló llajtaman rijcuna carca. Shuj cutinca chaipi cashpami Elcanaca paipaj cꞌuyashca huarmi llaquilla cajta ricurca. Chaimantami, ‘Ana ama huacaichu. Canca ñucatami charingui. Achcatami cꞌuyani’ nirca.

Chai qꞌuipami Anaca pailla Diosta mañanaman rishpa huacacurcalla. Jehová Diostaca rogarishpami, ‘shuj huahuata cuhuai. Paitaca paipaj tucui causaipimi canta sirvichun canman cusha’ nishpa mañarca.

Sacerdotecunata mandaj Elica Ana huacashpa shimita cuyuchicujtami ricurca. Chaimantami machashcachu cangui nirca. Anaca, ‘ñuca amito, mana machashcachu cani. Achca llaquilla cashpami. Mandaj Diosta mañacuni’ nirca. Elica pandarishcata cuentata cushpami Anataca, ‘can imata mañashcataca Taita Dios cuchun’ nirca. Anaca ña alli sintirishpami chaimanta rirca. Manaraj huatayajpimi paica shuj cꞌari huahuata charirca. Chai huahuataca Samuel shutitami churarca. Anaca achcatami cushicushca canga ¿nachu?

 Anaca Diosman cushami nishcataca mana cungarircachu. Samuel chuchunata saquincami Diospaj carpa huasipi Diosta sirvichun pusharca. Anaca Elimanca, ‘cai huahuata cuchunmi Mandaj Diosta mañacurcani. Paica tucui paipaj causaipimi Mandaj Diospaj canga’ nircami. Elcanapish Anapish cada huatami shuj mushuj jahua churanata apashpa Samuelta visitanaman rijcuna carca. Asha tiempo qꞌuipaca Anaca Diospaj ayudahuanca quimsa churicunata ishqui ushushicunatami charirca.