Israel nacionniyuq Elcana sutiyuq runapa warminkunam karqa Anawan Penina. Anaqa mana wachakuqmi karqa, chaymi Peninaqa achka wawayuq kaspan Anata ñakarichiq. Sapa watam Elcanaqa ayllunta Silo llaqtaman pusaq Jehova Diospa carpanpi yupaychanankupaq. Huk punchawmi Elcanaqa musyarurqa Ana llumpay llakisqa kasqanta, chaymi Anata nirqa: “Amaña waqaychu, ñuqaqa anchatam kuyayki”, nispa.

Chaywanpas Anaqa sapallanmi llumpayta waqaspan Diosta mañakurqa: “Qari wawata quykuwaptikiqa qampaqmi sapaqchapusqayki wañukunankama”, nispa.

Anapa waqasqantawan simillan kuyusqanta qawaspanmi, sacerdotekunapa jefen Eliyqa sinkapaq hapirqa. Anañataqmi nirqa: “Amayá hapillawaychu sinkapaqqa, ñuqaqa Jehova Diosmanmi tukuy llakiykunata willakuchkani”, nispa. Eliyñataqmi nirqa: “Jehova Diosyá mañakusqaykita qusunki”, nispa. Chaymi Anaqa sunqun hawkayaykuptin pasakurqa, hinaspam manapas huk watamanta qari wawata wachakururqa, sutinmi karqa Samuel.

Anaqa Diostam nirqa wawanta qunanpaq, chaymi anukaruspallan Diospa carpanman aparqa. Chaypim Eliyta  nirqa: “Diostam mañakurqani kay wawata quwananpaq, chaymi apamurqani wañukunankama Diostaña yupaychananpaq”, nispa. Chaynapim Elcanawan Anaqa sapa wata Samuelman pachanta apaqku. Tiempopa risqanman hinataqmi Anaqa Diospa yanapakuyninwan kimsa qaritawan iskay warmitawanraq wachakurqa.