Jekh Izraelco kova vičindža pe Elkana hine le duj romnja – i Ana hem i Fenina. Ama, ov manglja pobuter e Ana. I Fenina celo vreme mardža muj e Anače odoljese so na hine la čhave, a i Fenina hine la but čhave. Svako berš o Elkana igardža peklje porodica te den žrtva e Jehovase ko Silom, kaj hine o sveto šator. Jekh puti, dži hine ko Silom, ov dikhlja so oljesi manglji Ana, hine but tužno. O Elkana phendža: „Ma rov, Ana. Ače, me hijum tuvaja hem me mangava tut.“

Hari palo odova, i Ana dželji kokri ko sveto šator te molini pe. Dži molindža pe e Jehovase te pomožini la, naštindža te čhinavi o rojbe. Oj obećindža: „Jehova, ako dindžan man murše, me ka dav lje tuče te služini celo poklo dživdipe.“

O prvosvešteniko, o Ilije, dikhlja sar i Ana vačeri kokri peja, ama na šundžola lako glaso hem mislindža soj tani mati. Ama, oj phendža ljese: „Na hijum mati, gospodare, nego isi man baro problemi hem aljum te vačerav odova e Jehovase.“ O Ilije haljilo so grešindža hem vačerdža e Anače: „Nek del tut o Devel odova so rodeja oljestar.“ I Ana osetindža pe pošukar hem dželji pe drumoja. Aver berš, i Ana bijandža murše hem čhivdža ljeso nav Samuilo. Šaj li te zamisline kobor hine radosno i Ana?

 I Ana na bisterdža so obećindža e Jehovase. Samo so čhinavdža te del e Samuilese thud, oj igardža lje ko sveto šator te služini e Jehovase. Oj phendža e Ilijese: „Ače, o čhavo aso kova molindžum man. Dava lje e Jehovase te služini celo po dživdipe.“ O Elkana hem i Ana svako berš dželje te posetinen e Samuile hem igardže ljese po jekh nevi tunika. O Jehova dindža e Anače pana trin murša hem duj čhaja.