Hilqaana yinanni Israeelaawichira Haannanna Finaana yinanniri lame galte noosi; kayinni isi Haanna roorse baxanno. Haanna ooso diˈˈiltino, Finaanara kayinni haammata ooso noose; konni daafira ise Haanna mishshanno. Hilqaana Maganoho kakkalo shiqishiˈrara diru dirunkunni Seelo yinanni katama haˈranno. Mitto barra insa hakko heeˈreenna Hilqaana Haanna lowo geeshsha dadillitinota lai. Isi togo yiise: ‘Haanna wiˈlitooti ballo. Ani ate lowo geeshsha baxeemmohe.’

Gedensaanni Haanna huuccatto assidhara insawiinni kaˈe hadhu. Hururante wiˈlitanni Yihowa kaaˈlasera huuccidhu. Ise Yihowara togo yite xaˈnitino: ‘Labbaa qaaqqo uyittoero, heeshshosi diro woˈma soqqamannohe gede atera eemmahe.’

Kakkalaanote Biili Eeli, Haanna heqqifatte wiˈlitanna laino daafira dimbitinoha lawinosi. Haanna Eelira togo yitu: ‘Mootichaˈya, diiwe dimboomma. Ani qarramoomma daafira, konne qarra Yihowara hasaaphanni noomma.’ Eeli coyiˈrinori soˈro ikkinota afe, ‘Maganu huucciˈroottare oohe’ yiise. Hakkiinni Haanna hagiidhitanni minisera hadhu. Mitto diro woˈmikkinni Haanna labbaa qaaqqo iltu; qaaqqisera suˈma  Saamueeli yite fushshitu. Haanna qaaqqo ilte mageeshshi geeshsha hagiidhitinoha lawannohe?

Haanna Yihowara eˈino qaale dihabbino. Saamueeli unuuna qana aguranni heeˈreenna Maganoho soqqamanno gede qullaawa dunkaana haadhe hadhino. Ise Eelira togo yitu: ‘Yihowa konne qaaqqo aaera huucciˈroomma; Isino huucciˈroommaha uyinoe. Qaaqqiˈya lubbote noo geeshsha Yihowaha ikkanno.’ Hilqaananna Haanna diru dirunkunni Saamueeli laˈˈara Seelo katama haˈranno woyite, aanaanni uddiˈrannota haaro uddano haaˈre haˈranno. Yihowa Haannara wole sase labballonna lame seenne uyinose.