Sěngkatau esẹ Israel arenge Elkana piạ darua kawinge, i Hana dingangi Penina. Katewe, i sie limembong masayang si Hana. I Penina masau mělẹ̌langehẹ̌ si Hana ual᷊ingu i Hana tawẹ apa anạe, katewe i Penina piạ lawọ anạ. Sabang taung, Elkana měbẹ̌bawa kěluargane sarang Syilo gunang měngibadah su tabernakel. Su sěngkatempo, su tabernakel, i sie nakasilo si Hana sěbạe nasusah naung. I sie naul᷊ị, ’Abe sangị Hana. Si kau bědang piạ iạ. Iạ masayang si kau.’

Bọu ene, i Hana natamai gunang mẹ̌doa. Kạsangịe i sie nẹ̌dorong tul᷊ung si Yehuwa. I sie nẹ̌diandi, ’Yehuwa, mạeng i Kau měgělị anạ si siạ, iạ sarung měgělị i sie si Kau, kụ su kanandụu wiahe i sie sarung měkoạ kapulu-Nu.’

Eli, Imang Mawantugẹ̌, nakasilo si Hana sụsangị kụ su pěndange i Hana wukang. Hana naul᷊ị si sie, ’Iạ tawẹ wukang Tuang. Iạ piạ masalah gěguwạ, kụ iạ nẹ̌běke si Yehuwa.’ I Eli apidu nakaěna i sie seng nẹ̌sal᷊a kụ naul᷊ị, ’Karimạko Mawu měgělị apa nirorongangu.’ Hana nakapěndang těnang, bọu ene i sie napul᷊ẹ. Tawe nakarating sěntaung, i sie nakaěbạ anạ. Arengu anạe, Samuel. Tantu i Hana sěbạe mal᷊uasẹ̌.

 Hana tawe niwul᷊e diandine si Yehuwa. Su apang i Samuel seng tawe měnẹ̌nusu, Hana nẹ̌bawa si sie sarang tabernakel gunang měhal᷊ẹ̌ sene. Hana nẹ̌bera si Eli, ’Ini anạ takụ nirorong su daroaku. Iạ mapulu měgělị i sie gunang pakiědang si Yehuwa su kanandụu wiahe.’ Sabang taung, Elkana dingangi Hana mětẹ̌tiwo si Samuel apidu nẹ̌bawa lakụ buhu manandụ gunang i Samuel. Yehuwa lai něgělị anạ si Hana, tatělu esẹ dingangu darua wawine.