Orgen lu ken Iserael, iti na ér Elkana. Yange lu a kasev uhar, iti i kwase na u môm ér Hana, ugen la di iti na ér Penina. Kpa Hana yange hemba doon un ishima. Penina yange a zer lahan Hana sha ci u Hana mar wan ga, kpa un yô, mar ônov kpishi. Hanma inyom yô, Elkana yange a mough a tsombor na ve za ken Shilo, ve za civir Yehova ken tabernakel. Kwagen la mba ze yô, Elkana nenge ishima vihi Hana, kwase na u doon un ishima tsung la. Elkana maa kaa a na ér: ‘Hana kwase wam, de u vaan. Mo m ngu u wou. U doom ishima.’

Shighe kar yô, Hana undu ve yem lu za eren msen un tswen. Lu vaan eren msen, zamber a Yehova ér a wase un. A er msen la a tôndo zwa ér: ‘Yehova, aluer u nam wan u nomso yô, me hide a na me na u, una er u tom ken ayange a uma na cii.’

Er Pristi u Tamen, Eli nenge Hana lu vaan sôngor yô, a kaa ér Hana ngu hunden msôrom. Hana maa kaa a na ér: ‘Ei, terem, m ngu hunden msôrom ga. M ngu a zayol u vesen, nahan m ngu ôron Yehova.’ Eli maa nenge ér kwagh u un ôr a na la ka shami ga. Tsô a kaa a Hana ér: ‘Yehova a na u kwagh u u sônon un la.’ Ishima maa de u vihin Hana, a mough a yem. Kera tsa kuma inyom ga maa Hana mar wan u nomso, a ii un iti ér Samuel. U hen wer yange a saan Hana iyol kpishi ga he?

 Hana yange hungur kwagh u tôndo zwa a Yehova ér una er la ga. Yange den Samuel atumba je maa, yem a na ér a za eren tom ken tabernakel. A za kaa a Eli ér: ‘Ka wan u yange m sôn Yehova mer a nam je ne. Hegen m ngu geman un nan Yehova mer a lu u na ken ayange a uma na cii.’ Hanma inyom yô, Elkana man Hana yange ve za nenge a Samuel shi ve za un a ikyondo i gban ave sha. Yehova shi na Hana ônov mba nomso mbagenev utar kua mba kasev uhar, seer sha Samuel.