Umwi mwaalumi wachiIsrayeli wakali kutegwa Elikkana wakakwete bakayintu babili, umwi wakali kutegwa Hana, umwi kategwa Penina pesi wakali kuyandisya Hana. Penina wakali kupenzya Hana chiindi choonse nkaambo Hana taakalikwe bana pe. Munyaka amunyaka, Elikkana wakali kwiinka kutente lyakukombela ampuli yakwe kuShilo. Chimwi chiindi nibakali kuShilo, Elikkana wakabona kuti mukayintu wakwe ngwaakali kuyandisya Hana wakaluuside. Mpawo Elikkana wakati: ‘Utanoolili Hana. Tandikuboteli na? Ndilakuyanda.’

Nikwakaba chiindi, Hana wakaya kukukomba alikke. Chiindi naakali kukomba kuli Jehova kuti amugwasye, wakali kulila. Wakasyomezya Jehova kuti: ‘Jehova ikuti wandipa mwana mulombe, ndiyoomupa kuli nduwe kuti akakubelekele buumi bwakwe boonse.’

Mupayizi Mupati Eli wakabona Hana kalila alimwi wakayeeya kuti Hana ulikoledwe. Hana wakati: ‘Peepe mwami, tandikoledwe pe. Ndilaapenzi pati nkinkaako, ndalikubuzya Jehova.’ Eli wakabona kuti nzyakaamba tazili kabotu, nkikaako, wakati: ‘Leza akupe nchukumbila.’ Naakamana kukomba, Hana wakamvwa kabotu mpawo wakeenda. Kawutanamana munyaka, Hana wakatumbuka mwana mulombe alimwi wakamuuzika kuti Samiyele. Ubonaanga Hana wakamvwa biyeni?

Hana taakachiluba pe chisyomezyo nchaakasyomezya Jehova. Naakaleka  kunyonka Samiyele, wakamutola kutente lyakukombela kuti akabeleke nkuko. Mpawo Hana wakabuzya Eli kuti: ‘Ngomwana ngundakali kukombela, ndiyanda kumupa Jehova kuti amubelekele buumi bwakwe boonse.’ Munyaka amunyaka, Hana aElikkana bakali kuswaya Samiyele alimwi bakali kumweetela jansi. Kuzwa waawo, Jehova wakachita kuti Hana abe abana balombe batatu abasimbi babili.