E taata Iseraela o Elikana. E piti vahine ta ˈna: o Hana e o Penina. Mea here aˈe râ Elikana ia Hana. Ua tamau Penina i te faaooo ia Hana no te mea aita ta Hana e tamarii. Mea rahi râ ta Penina tamarii. I te matahiti taitahi, e haere Elikana e to ˈna utuafare e haamori ia Iehova i te sekene i Silo. I te hoê taime, a haere ai ratou i ǒ, ua ite o Elikana e ua mauiui roa ta ˈna vahine here e, o Hana. Ua parau atu: ‘Eiaha na e taˈi, Hana. E ere o oe anaˈe, tei ia oe râ vau. E ua here au ia oe.’

I muri iho, ua haere Hana e pure o ˈna anaˈe. Ua taˈi noa o ˈna a taparu ai ia Iehova ia tauturu ia ˈna. Ua euhe oia: ‘E Iehova e, a horoa mai na hoê tamaiti na ˈu. E horoa ˈtu vau ia ˈna ia oe e e tavini oia ia oe i te roaraa o to ˈna oraraa.’

Ua ite te tahuˈa rahi, o Eli to ˈna iˈoa, e te taˈi ra o Hana. Ua manaˈo oia e ua taero Hana. Ua parau atura Hana: ‘Aita vau i inu i te ava, e ta ˈu fatu e. E fifi rahi to ˈu e te faaite nei au i te reira ia Iehova.’ Ua taa ˈtura ia Eli e ua hape oia e ua parau atura oia: ‘Ia horoa te Atua i ta oe i ani atu.’ Ua maitaihia o Hana e ua hoˈi oia. Tau taime i muri iho, ua fanau aˈera oia i te hoê tamaiti, o Samuela to ˈna iˈoa. Ua oaoa roa o Hana, e ere anei?

Aita o Hana i haamoˈe i ta ˈna i euhe ia Iehova. I te taime Samuela i faaea ˈi i te inu i te û a to ˈna mama, ua afai Hana i ta  ˈna tamaiti i te sekene no te tavini atu. Ua parau oia ia Eli: ‘Teie te tamaiti ta ˈu i ani ia Iehova. I te roaraa o to ˈna oraraa, e horoa vau ia ˈna ia Iehova.’ Ua haere o Elikana raua Hana e farerei ia Samuela i te matahiti taitahi ma te afai atu i te hoê ahu apî aita e rima ahu. Maoti te tauturu a Iehova, ua fanau Hana e toru atu â tamaroa e e piti tamahine.