Ulume umue u Isareli o tukuiwa hati, Elikana, wa kuatele akãi vavali, umue Hana ukuavo Penina, pole, wa solele vali calua Hana. Penina wa enda oku yola epembe Hana olonjanja viosi, momo Hana ka kuatele omãla kuenda Penina wa kuatele omãla valua. Vunyamo lunyamo Elikana wa enda oku ambata epata liaye oku ka fendela votavernakulu yo ko Silo. Eteke limue osimbu va kala votavernakulu Elikana wa limbuka okuti ukãi waye Hana wa sumua calua. Eye wa popia hati: ‘A Hana, panga ohenda ku ka lile. Ove o kasi lame. Ame ndu ku sole.’

Noke Hana wa tunda likaliaye oku ka likutilila. Eye ka liwekelepo oku lila kuenje wa fetika oku pinga ku Yehova oco o kuatise. Eye wa likuminya hati: ‘A Yehova, nda wa nyiha omõla umue ulume, omõlaco ndu weca kokuove kuenje eye o ka ku vumba oloneke viosi viomuenyo waye.’

Ocitunda Cinene Eli wa mola okuti Hana o kasi oku sukoka kuenje wa sima okuti, Hana wa kolua. Hana wa tambulula hati: ‘Sio, a Ñala yange, ame sia koluele. Ndi kuete ocitangi cimue cinene kuenda ndi kasi oku vangula la Yehova catiamẽla kocitangi caco.’ Eli wa limbuka okuti eci a kala oku sima ka ca sungulukile kuenje wa sapuila Hana hati: ‘Suku a ku ĩhe eci o yongola.’ Kuenje Hana wa tunda wa enda lonjila yaye. Ka pa pitile unyamo kuenje  Hana wa cita omõla umue ulume wo luka hati, Samuele. O pondola hẽ oku sokolola esanju Hana a yeva vutima?

Hana ka ivaleleko ohuminyo a linga ku Yehova. Eci Samuele a sumuha, Hana wo wambata oco a ka vumbe votavernakulu. Eye wa sapuila Eli hati: ‘U eye omõla una nda likutililile. Vokuenda kuomuenyo waye wosi, o kundikiwa ku Yehova.’ Elikana kuenda Hana, va endaenda oku nyula Samuele unyamo lunyamo kuenda oku wambatela esanya limue liokaliye ka li kuete ovoko. Yehova wa ecelela vali okuti Hana o cita omãla vatatu valume kuenda vavali vakãi.