An Israelita nga hi Elkana may duha nga asawa, hira Hana ngan Penina, pero mas hinigugma niya hi Hana. Gintitinamay pirme ni Penina hi Hana kay waray anak hi Hana pero hiya damu. Kada tuig, igin-uupod ni Elkana an iya pamilya ngadto ha tabernakulo ha Shilo basi magsingba. Makausa, han nakadto hira, nakita niya nga masurub-on gud an iya hinigugma nga hi Hana. Hiya nagsiring: ‘Ayaw na pagtangis, Hana. Aadi man ako. Hinigugma ko ikaw.’

Katapos, kinadto hi Hana ha tabernakulo nga nag-uusahan basi mag-ampo. Diri niya mapugngan an pagtinangis samtang nakikimalooy kan Jehova nga buligan hiya. Hiya nagsaad: ‘Jehova, kon tagan mo ako hin anak nga lalaki, ihahatag ko hiya ha imo, ngan mag-aalagad hiya ha imo ha iya bug-os nga kinabuhi.’

Nakita han hitaas nga saserdote nga hi Eli nga nagbabakho hi Hana salit kahuna niya nga hubog hi Hana. Hi Hana nagsiring: ‘Diri, ginoo ko, diri ako hubog. Daku an akon problema, ngan iginsusumat ko ito kan Jehova.’ Nahunahuna ni Eli nga sayop hiya salit nagsiring hiya: ‘Ihatag unta han Dios an imo karuyag.’ Naggaan an pag-abat ni Hana ngan umuli hiya. Waray mag-usa ka tuig, nagkaanak hiya ngan an bata ginngaranan hin Samuel. Nahuhunahuna mo ba an daku nga kalipay ni Hana?

 Waray hingalimti ni Hana an iya saad kan Jehova. Han nalutas hi Samuel, gindara niya hi Samuel ha tabernakulo basi mag-alagad didto. Hiya nagsiring kan Eli: ‘Ini an bata nga akon igin-ampo. Ipapahuram ko hiya kan Jehova ha iya bug-os nga kinabuhi.’ Kada tuig, ginbibisita nira Elkana ngan Hana hi Samuel ngan gindadad-an hin bag-o nga bado nga waray pako. Gintagan ni Jehova hi Hana hin tulo pa nga anak nga lalaki ngan duha nga anak nga babaye.