Elcanaeʼ juntúul israelita yaan kaʼach kaʼatúul u yatanoʼob: Ana yéetel Peniná. Chéen baʼaleʼ letiʼeʼ u maas yaabiltmaj Ana. Peninaeʼ yaʼab u paalal kaʼachi, tiʼ Anaeʼ minaʼan mix juntúuliʼ. Le oʼolal Peninaeʼ jach ku burlartik Ana. Cada añoeʼ Elcanaeʼ ku bisik kaʼach tuláakal u familia tu kaajil Siló utiaʼal u adorartikoʼob Jéeoba teʼ tabernaculooʼ. Juntéenjeak le tiaʼanoʼob teʼeloʼ Elcanaeʼ tu tsʼáaj cuenta jach lubaʼan u yóol Ana. Le oʼolal tu yaʼalajtiʼ: ‹Ana, maʼ a wokʼol. Way yanen ta wiknaleʼ. Jach in yaabiltmech›.

Ka tsʼoʼokeʼ Anaeʼ bin orar tu juunal. Letiʼeʼ láayliʼ táan u sen okʼoleʼ ka tu kʼáataj tiʼ Jéeoba ka áantaʼak. Tu yaʼalajtiʼ: ‹Jéeoba, wa ka tsʼáaik juntúul in chan hijoeʼ, yaan in kʼubiktech, utiaʼal ka u meyajtech tuláakal u kʼiiniloʼob u kuxtal›.

Elí, le nojoch sacerdoteoʼ, tu yilaj táan u yokʼol Ana yéetel chéen táan u kikilankil u chiʼ maʼ tu páajtal u tʼaan, le oʼolal tu tuklaj kalaʼan. Anaeʼ tu yaʼalajtiʼ: ‹Maʼ, in yuum maʼ kalaʼaneniʼ. Baʼaxeʼ yaan baʼax beetik u yaatal in wóol, letiʼe baʼax táan in waʼalik tiʼ Jéeobaoʼ›. Elieʼ tu tsʼáaj cuentaeʼ maʼ maʼalob bix u tuukuliʼ, le oʼolal tu yaʼalaj tiʼ Ana: ‹Ka u tsʼáatech Jéeoba le baʼax ta kʼáatajtiʼoʼ›. Ka luukʼ Anaeʼ maas maʼalob u yuʼubikuba. Maʼ u tsʼáaj junpʼéel año ka anchaj juntúul u chaambal Anaiʼ, tu tsʼáaj u kʼaabaʼt Samuel. ¡Máans ta tuukul bix kiʼimakchajik u yóol!

 Anaeʼ maʼ tu tuʼubsaj le promesa u beetmaj tiʼ Jéeobaoʼ. Chéen pʼelak tu luʼsil u chuʼuch Samueleʼ tu bisaj teʼ tabernáculo utiaʼal ka u meyajt Diosiʼ. Letiʼeʼ tu yaʼalaj tiʼ Elí: ‹Tin kʼáataj tiʼ Jéeoba ka u tsʼáaten in chan hijoaʼ, le oʼolal tin taasaj in kʼubtiʼ utiaʼal u meyajtik tuláakal u kʼiiniloʼob u kuxtal›. Elcaná yéetel Anaeʼ ku bin u xíimbaltoʼob kaʼach Samuel cada año yéetel ku biskoʼobtiʼ junpʼéel chan nookʼ túumben minaʼan u kʼabiloʼob. Yéetel u yáantaj Jéeobaeʼ, ka máan kʼiineʼ Anaeʼ anchaj uláakʼ óoxtúul u hijoʼob yéetel kaʼatúul u hijaʼob.