Elcaná nga ti hombre israelita ni gupa chupa xheelaʼ: Ana ne Peniná. Peru jma gunnaxhiibe Ana. Gupa Peniná stale xiiñiʼ, peru Ana qué ñapa nin tobi. Ngue runi biʼniʼ burla Peniná Ana. Guiráʼ iza, riné Elcaná familia stiʼ Siló para guni adorarcaʼ Jiobá ndaaniʼ tabernáculo. Ti biaje, laga nuucabe raqué, bidii Elcaná cuenta guizáʼ triste nuu Ana. Ngue runi gúdxibe laa: «Cadi gúʼnaluʼ Ana. Raríʼ nuaaʼ, ne nadxieeʼ lii stale».

De raqué, biree Ana ziguni orar. Qué ganda igánibe, ngue runi gunábabe Jiobá gacané laabe. Ndiʼ nga promesa bíʼnibe Jiobá: «Pa gudiiluʼ naa ti xiiñeʼ, zudieeʼ laabe lii para gúnibe ni naluʼ guidubi xquendanabánibe».

Biiyaʼ sumo sacerdote Elí cayuunaʼ Ana dede cayacaditi guidi ruaa, ngue runi guníʼ ique Elí naxúdxibe. Para gudxi Ana laabe: «Coʼ señor stinneʼ, cadi naxudxediáʼ. Napaʼ ti guendanagana nabé naroʼbaʼ ne canieniáʼ Jiobá». Bidii Elí cuenta cadi jneza ni guníʼ ique, ngue runi gúdxibe Ana: «Jiobá gudii lii ni gunábaluʼ laa». Guyuudxí ladxidóʼ Ana ne biree zeʼ. Ante guizaa ti iza, gupa Ana ti baʼduhuiiniʼ ne gulee labe laa Samuel. ¿Ruxuíʼluluʼ pabiáʼ biecheʼ Ana la?

 Qué nusiaandaʼ Ana promesa ni biʼniʼ Jiobá. Cásipeʼ guleebe niidxi ruaa Samuel, yesaanabe laa ra tabernáculo para guni xhiiñaʼ Dios. Gúdxibe Elí: «Bineʼ orar Jiobá para gudii naa baʼduhuiiniʼ riʼ. Yanna zedasaanaʼ laabe para gúnibe xhiiñaʼ Dios guidubi xquendanabánibe». Guiráʼ iza rié Elcaná ne Ana rigánnacaʼ Samuel ne rinécabe ti lari sin manga rusigáʼdecabe laa. Despué, gucané Jiobá Ana para gupa chonna xiiñiʼ hombre ne chupa gunaa.