Toib israelita ni góc laa Elcaná goyoʼ chop tzeel, toib góc laa Ana né stoib góc laa Peniná, per Elcaná más binladxbu Ana. Peniná goyoʼ xidal xiin per Ana diti goyoʼ xiin, por ngú guirá ór bixiichbu Ana. Guirá íz, Elcaná goyné xfamily lainy tarbernáculo ni goyoʼ gudx Siló par guienyibu Jehová. Toibtica dzú laʼga goyoʼyibu cú, Elcaná biduidy cuent que Ana nigolú noʼ nabann. Elcaná gochbu Ana: «Ranába looy diti cudxaʼlo. Naplo naʼ. Naʼ ronladxi looy».

Después Ana bireʼ tiplad né goninébu Jehová. Nigolú gorudxaʼdotbu né gonabbu Jehová gacné láabu. Goniʼbu: «Jehová, pal raduidylo toib mbioxguieuyen naʼ, naʼ sadudi láabu looy par gonybu xchiinlo laʼga guibanybu».

Toib sumo sacerdote ni góc laa Elí bibiʼbu que Ana cayibdxaʼ né casis roʼ por ngú bunybu pensary que Ana casoch. Ana góoch láabu: «Yaca, diti casodxi. Cacalóya toib galnagan né cayabi láani Jehová». Elí biduidy cuent que bigotzbu dool Ana por ngú goniʼbu: «Dios saduidy ni nainy looy». Ana gosacbu sacró né bibiguetbu lidxbu. Órni yása guisaʼ tobiz, gool Samuel. Ana nigolú bibaladx, ¿scú ja?

Ana dipa bialadxbu ni gochbu Jehová. Órni goleʼbu niich roʼ Samuel,  goynécabu Samuel lainy tabernáculo. Ana gochbu Elí: «Gonaba Jehová naduidy toib mbioxguieuyen naʼ. Nigoreʼ sitsaʼna láabu reʼ par gonybu xchiin Dios laʼga nabanybu». Elcaná né Ana guirá íz goyguenyibu Samuel né biscadbu toib coton ñaron par guac Samuel. Después Jehová buny que ñoʼ gáay xiin Ana, tzón buñguieeu né chop buñgonaʼ.