Jo Icrael dok guweko Jehovah ci gucako woro lubange me goba. I kare ma jo Ammon gubedo ka lweny i kom jo Icrael, lubange me goba magi pe gukonyogi. Pi mwaki mapol, jo Icrael gudeno can. Lacen, gin gukok bot Jehovah ni: ‘Wabalo i nyimi. Dong ilarwa ki i cing lumonewa.’ Jo Icrael gubolo cal apaya ma gubedo ka woro woko ci gucako woro Jehovah doki. Jehovah onongo dong pe mito ni gumedde ki deno can.

Kiyero twon oteka lweny ma nyinge Jeputa me telo wi jo Icrael pi lweny i kom jo Ammon. En okwonge bot Jehovah ni: ‘Ka ikonya me loyo lweny man, ngat ma okwongo kati woko ki i oda me rwatte kweda ka adwogo ki i loyo lweny, an abimiyo boti.’ Jehovah owinyo lega pa Jeputa ci okonye me loyo lweny.

 I kare ma Jeputa odwogo gang, ngat ma okwongo kato woko me rwatte kwede obedo nyare, latinne acel keken. En onongo tye ka myel kun woto ki yengo ajaa. Ngo ma onongo Jeputa twero timo? Wiye opo i kom kwongene ci owacci: ‘Maa do, nyara! Ituro cwinya woko. Akwonge woko bot Jehovah. Me gwoko kwongena, myero acwali ka tic i kema me woro i Cilo.’ Ento nyare ogamo ni: ‘Wora, ka ikwonge bot Jehovah, myero igwok kwongeni. Alego ni iwek abedi pi dwe aryo i kor godi kacel ki anyira luwota, ka dong abicito.’ Nya pa Jeputa otiyo i kema me woro pi kare me kwone ducu. Mwaka ki mwaka, lureme onongo gicito i Cilo ka limme.