Israelitanakajj mayampwa Jehová Diosat armasisajj falso diosanakar adorjjapjjäna. Kunapachatï Ammón markankir jaqenakajj israelitanakar tʼaqesiyäna ukhajja, uka falso diosanakajj janiw jarkʼaqapkänti. Walja maranakaw israelitanakajj ukham tʼaqesipjjäna. Ukatwa Jehová Diosar akham sasin mayisipjjäna: ‘Nanakajj juchachasipjjtwa. Mirä amp suma, enemigonakajat salvapjjakitaya’ sasa. Ukatsti israelitanakajj taqe idolonakap tʼunjapjjäna, Jehová Diosarurakiw mayampi adorjjapjjäna. Diosasti janiw israelitanakan jukʼamp tʼaqesipjjañap munjjänti.

Israelitanakajja, guerran nuwasiri Jefté chacharuw ajllipjjäna. Jupaw ammonitanakampi nuwasiñatakejj pʼeqtʼäna. Jefté chachajj akham sasaw Jehová Diosar mä promesa luräna: ‘Jumatï  aka guerran atipjañatak yanaptʼapjjetätajja, khititï nayar katoqerejj utajat nayraqat mistunkani ukarojj jumaruw churjjäma’ sasa. Jehová Diosajj uka mayisitap istʼänwa, ukatwa atipañapatak Jefté chachar yanaptʼäna.

Jefté chachajj utapar kuttʼjjäna ukhajja, nayraqatjja phuchapaw katoqerejj panderetas tuktʼasisa thoqtʼasisa mistunïna. Jefté chachajj uka sapa wawanikïnwa. Ukhamajj ¿kunsa lurpachäna? Promesap amtasaw jupajj akham säna: ‘¡Ay imill wawa! Walpun llakisiyista. Jehová Diosarojj mä promesa lurtjja, uk phoqañatakejj Siló markankir tabernaculoruw jumar khitañajätjja, ukan Diosar serviñamataki’ sasa. Phuchapasti akham sarakïnwa: ‘Papitu, Jehová Diosar lurkta uka promesamjja phoqañamawa. Aka mayak mayiñ munsma: amiganakajampiw qollunak toqer pä phajjsi sarañ munta. Uka qhepatwa tabernaculor sarjjäjja’ sasa. Jefté chachan phuchapajj jiwañkamaw tabernaculon Diosar taqe chuyma servïna. Amiganakapajj sapa maraw Siló markarojj visitir sarapjjerïna.