Lôk Israel i bi kôm Yéhôva mbus, i bôdôl bégés banyambe bape. Ndi ngéda Lôk Amôn i bi suu Lôk Israel gwét, i bép ki bo, banyambe bap ba bi la bé hôla bo. Lôk Israel i bi nok ndutu ngandak nwii. Sôk i nsôk, ba kal Yéhôva le: ‘Di bi boñ béba. Soho tohol bés i moo ma baoo bés.’ Lôk Israel i bi tjé bisat gwap, i témb i bôdôl bégés Yéhôva. Yéhôva a bé gwés ha bé ki le ba nok ndutu.

Yéfta, mut gwét wada, a bi téba inyu éga Lôk Israel i jôs Lôk Amôn. A kal Yéhôva le: ‘Ibale u nhôla toi bés i bép gwét, me mbôn we le, ngéda me ga huu i mbai yem, me nti we mut bisu a nlo boma me.’ Yéhôva a emble masoohe ma Yéfta, a hôla ki nye i bép gwét.

 Ngéda Yéfta a bi huu i mbai yé, mut bisu a bi lo boma nye a bé ngond yé, pom yé man. A bé a nsak, a kôdôk ngom. Kii Yéfta a bé lama boñ? A hoñol mbônga wé, ndi a kal le: ‘Wééi, a ngond yem! U nsunus me ñem. Me bi bôn Yéhôva ngim jam. Inyu boñ le me yônôs jo, me nlama om we i Silô.’ Ndi ngond yé i kal nye le: ‘A ta, ibale u mbôn Yéhôva ngim jam, yônôs jo. Ndi, yom yosôna me mbat we yon i yé le, nwas me ni mawanda mem, di kee, di tégbaha sôñ iba i ngii dikôa. Ndi me ga ke.’ Ngond i Yéfta i bi sélél Yéhôva niñ yé yosôna i témpel, ikété telepsép. Hiki nwii, mawanda mé ma bôda ma bé ke pôdôs nye i Silô.