Kɛ ɔ́ kɔ́ i ɲrun’n, Izraɛlifuɛ mun be wa yacili Zoova i sulɛ ekun, kpɛkun be sɔli amuin mun. Kɛ Amɔnfuɛ mun be nin be bali alɛ kunlɛ’n, be amuin sɔ mun b’a kwlá ukaman be. Izraɛlifuɛ mun be wunnin be ɲrun afuɛ kpanngban. Be seli Zoova kɛ: ‘E fɔnnin. Yaci, uka e naan e kpɔfuɛ mun b’a kwlaman e.’ Be bubuli be amuin mun be nun. Kpɛkun be wa suli Zoova ekun. Zoova kunndɛman kɛ be wun be ɲrun sa trilili.

Zoova fali alɛ kunfuɛ kpa kun kɛ ɔ dun Izraɛlifuɛ mun be ɲrun naan be nin Amɔnfuɛ mun be ko kun. Be flɛ alɛ kunfuɛ sɔ’n kɛ Zɛfte. Zɛfte seli Zoova kɛ: ‘Sɛ a uka min naan n kwla’n, kɛ ń sá min sin awlo’n, sran klikli ng’ɔ fin min awlo lɔ wa kpa min atin’n, ń fɛ́ i ń fá mán wɔ.’ Zoova tieli Zɛfte i srɛlɛ’n. Ɔ yoli maan Zɛfte kwlɛli i kpɔfuɛ mun.

Kɛ Zɛfte sɛ́ i sin i awlo’n, sran klikli ng’ɔ bɛli i atin kpalɛ’n, yɛle i wa bla m’ɔ ti i wa kunngba cɛ’n. Kɛ i wa’n bá’n, nn ɔ́ sí able yɛ ɔ́ bó klɛn. ?Ngue yɛ Zɛfte yó-ɔ? I wla kpɛnnin ndɛ ng’ɔ kan kleli Zoova’n su. Kpɛkun ɔ seli kɛ: ‘Ɔo, min wa. W’a kun min. N tali Zoova nda. Ɔ fata kɛ n fa wɔ ko mɛn i naan a su i i tannin sua’n nun Silo lɔ, naan m’an yia nda sɔ’n i nuan.’ I wa’n seli i kɛ: ‘Baba, sɛ a tali Zoova i nda’n, ɔ fata kɛ a yiɛ i nuan. Sanngɛ, ń srɛ́ wɔ like kun. Man min anglo nɲɔn naan e nin min janvuɛ bla mun e wɔ oka mun be su lɔ ka naan m’an wɔ.’ Zɛfte i wa’n suli Ɲanmiɛn i tannin sua’n nun lɔ lele i wie cɛn. Afuɛ kwlaa’n, i janvuɛ mun be kɔ Silo lɔ be ko niɛn i osu.