Abena Israele na kabili balilekele ukupepa Yehova kabili batampile ukupepa tulesa twa bufi. Ilyo abena Amone baile mu kulwa na bena Israele, tulesa twa bufi uto balepepa tatwabafwile. Pa myaka iingi abena Israele balecula. Basukile baeba Yehova ati: ‘Natubembuka. Twapapaata tupususheni ku balwani besu.’ Abena Israele balyonawile ifilubi balepepa kabili batampile ukupepa Yehova na kabili. Yehova talefwaya ukuti balecula.

Umushilika uo baleita ati Yefta e o basalile ukuti abe umukalamba wa bashilika ilyo baile mu kulwa na bena Amone. Yefta aebele Yehova ati: ‘Nga mwatwafwa ukucimfya muli iyi nkondo, nga nabwela ku ng’anda, nkamupeela umuntu uukabalilapo ukufuma mu ng’anda ku kunsengela.’ Yehova  alyumfwile ipepo ilyo Yefta apepele kabili alimwafwile ukucimfya inkondo.

Ilyo Yefta abwelele ku ng’anda, uwabalilepo ukufuma mwana wakwe umwanakashi. Yefta akwete fye umwana umo. Aishile alecinda ninshi alelisha na kaoma ka nyenjele. Bushe Yefta acitile shani? Aibukishe ifyo alaile Lesa, kabili alandile ati: ‘Iye we mwana wandi! Ala wanenga ubulanda. Nalilaile Yehova. Pa kuti mfikilishe ifyo nalaile, imfwile ukukuleka ukaye mu kubombela pa cikuulwa ca mushilo mu Shilo.’ Nomba umwana wakwe amwebele ati: ‘Tata, nga mwalilaya Yehova, citeni ifyo fine mwalaya. Nalamulomba fye ukuti muleke ndeya na banandi ku lupili pa myeshi ibili. Nga nabwela, nkesaya.’ Umwana wa kwa Yefta alebombela pa cikuulwa ca mushilo mpaka ilyo afwile. Cila mwaka abanankwe baleya ku Shilo mu kumumona.