Bone b’Israël be nga beta lume Yéhôva mvus a taté na ba kañe bivuse bezambe. Bezambe bete be nji volô be éyoñe Beammonite be nga zu wosane be. Bon b’Israël be nga nyiñe minju’u été tañ abui mimbu. Nde be nga su’ulane jô Yéhôva na: ‘Bi nga bo abé. Éngôngo te, kôté bia mo besiñe bangan.’ Bone b’Israël be nga mane bôé bengulemelane bap, a beta taté na ba kañe Yéhôva. Yéhôva a nji be a kômbô’ô beta yene be minju’u été.

Jephté nnye be nga tobe na a bo ntebe ôsu ya nkane bita ô nga ke wosane Beammonite. A nga jô Yéhôva na: ‘Nge ô volô ma na me dañe bita bi, ma ka’a wo na, éyoñe ma ye bulane nda jam, ma ye dasé wo môt ôsu a ye zu wubane ma.’ Yéhôva a nga  vô’ôlô meye’elane me Jephthé, a volô fe nye na a dañe bita.

Éyoñe Jephthé a nga bulane nda jé, môt ôsu a nga zu wubane nye a mbe ngo jé, atyi’i mone dé. A mbe a za’a a jeme’e, a bôme’e ngom. Éyoñ Jephthé a nga yene nye, nde a nga simesan ngaka’a a nga bo Yéhôva, ane a nga jô na: ‘Ééé, a ngo jam! Za avale jam ô boya ma di! Me nga bo Yéhôva ngaka’a. Asu na me tôé je, ma yiane lôme wo tabernacle Shilo na ô ke saé wôé.’ Ve, ngo jé é nga jô nye na: ‘A pa, nge wo te bo Yéhôva ngaka’a, wo yiane tôé je. Jôm étam me ne sili wo é ne na, me ke lôte ngon ébaé a bemvôé bam (bobebinga) minkôle yôp. Mvuse ya valé, ma ye ke.’ Ngone Jephthé é nga bo ésaé e tabernacle a nleme wé ôse, akekui a nga wu. Mbu ôse, bemvôé bé be mbe be za’a jome nye e Shilo.