Ábaya hígiruni ísüraelina Heowá lun háhuduragun houn búngiugu mama inarünitiña. Dan hageindagunbei amonna hama ísüraelina, míderagun hamutiña búngiugu mama inarünitiña ha únbaña háhuduragua. Súfuritiña meha ísüraelina luagu bandi irumu. Ábati hariñagun lun Heowá: “Afigouhaadiwa. Adügabá fulesei woun, sefubáwa hawéi wáganiñu”. Aba hagünrinchaguniña ísüraelina guáriua, ábayati háhuduragun lun Heowá. Aba mawandun laali lan larihiniña asufurira.

Aba lanúadirun aban wuriburuguna gíriti Hefüté lun lalidihaniña ísüraelina lidan hawuribuhan hama amonna. Ariñagati Hefüté lun Heowá: “Ánhawa bíderagua agañeira, füramasetina níchugubei lan furumiñeti gürigia le áfuriduti núbiñegiñe eresibirana bun, wügüri o  würi”. Aganba lumuti Heowá lafurieidun Hefüté ani íderagua lumuti agañeirei wuribu.

Dan lagiribudunbei Hefüté lúbiñoun, lisaani to ábanrügüboun áfuriduboun eresibirei, abinaheina luma áfareina panderu. Kati ladügübei Hefüté? Aba laritaguni füramasei le ladügübei, ábati lariñagun: “Lanarime san igarigu bíchugun nun, niráü! Adügaadina aban füramasei lun Heowá. Ani lun nagunfuliruni, mosu nóunahanibu eseriwida tidan sanduariu Siló”. Tariñaga lun: “Núguchi, anhein adügaadibu lubéi füramasei lun Heowá, mosu bagunfuliruni. Amuriahatina buma lun bígirunina lun nidin éibuga luagu burí wübü hama numadagu hiñaruñu luagu bián hati, lárigiñe, ábame nidin”. Seriwitu lisaani Hefüté lau úaraguni tidan sanduariu lun sun tibagari. Sagü meha irumu, houdin tumadagu bisidoun uburugu Siló.