Aizrayel amunyanyala Yehova dila yanawili, aroma wawebedha amilugu onyengetta. Mbwenye kaanukile-elo mudhidhi wagonjihiwani na akadda Amonita. Aizrayel atabuwa mwa vyaka dhinjene. Venevo ampigiriyela Yehova: ‘Nabuya niwuttegelani. Nivuneni mmadani mwa amwiddani ehu.’ Aizrayel atwa dhigamuttu dhebedhani, aroma omwebedha Yehova bahi. Yehova kafuna wila awoone awene atabuwaga.

Munyakoddo dhahi wakuweliwa Jefté wahisakuliwa wi asogorhele nlogo mukoddoni yawanilani na akadda Amonita. Odduya omuloba dhahi Yehova: “Mugaddivaha mmadani mwaga akadda Amon, ddiyelela owani-waga na mperhe, ole onroma obudduwa mba mwaga addifwarelaga miyo,  ddinomulevela Nabuya.” Yehova ovuruwana malobelo a Jefté, omukamyedha opemberha.

Jefté eyelelaga owani-waye, oromile onfwarela ddi mwanaye wa muyana, wa nammodha. Odduya wela otxetta oku bagamoba junju. Jefté agakosile dhavi? Iyene ohubuwela yalibeliye, nanda ologa dhahi: “Iyi mwanaga! Weyo onoddiparhutxa murima. Ddimwirela Mulugu nipikirelo nihinwodha miyo wiyihedha mundduni.” ‘Ddinele ouruma wi wakale otabernakulu eli o Silo.’ Mwanaye omwakula: “Babani, akala mumwirela Nabuya nipikirhelo, ddikoseleni dhiddubelelinyu.” ‘Miyo ddinokumbirha murome oddittiya ddikale myeri minli bahi, wi ddarome waredha na anamwali akwaga. Ddigamala ddinodhowa otabernakulu.’ Mwana wa Jefté omulaba Nabuya egumi yaye yotene bali mmusasani. Vyaka dhetene anamwali akwaye andowa o Silo wi amoone.