A a manga kitana naba Iehova tibun Iteraera ao a taromaurii atua aika kewe. A buakanaki tibun Iteraera irouia tibun Ammon, ao bon akea buokaia mairouia atuaia aika kewe akanne. A karawawataaki tibun Iteraera i nanon ririki aika bati. Ao a taku nakon Iehova: ‘Ti boni bure. Taiaoka kamaiuira mairouia taani kairiribai nakoira.’ A a urui aia bouannanti tibun Iteraera ao a a manga taromauria Iehova. E aki tangiria Iehova bwa a na teimatoa n rawawata.

Iai te tia buaka ae korakora ae Iebeta ao e rineaki bwa aia mataniwi aomata ake a na buakania tibun Ammon. E taku nakon Iehova: ‘Ngkana ko buokira bwa ti na tokanikai n te buaka aei, ao I berita bwa ngkana I okira mwengau, ao te moan aomata ae otinako man au auti ni butimwaeai, e na riki bwa am bwai.’ E  ongoraea ana tataro Iebeta Iehova ao e buokia n anganna te tokanikai.

Ngke e a okira mwengana Iebeta, te moan aomata ae otinako ni butimwaeia bon natina te aine ae ana rikitemanna. E katanga te tamboriin neiei ao e mwamwaie. Tera ae e na karaoia Iebeta? E uringa ana berita ao e taku: ‘Akea ngai natiu! Ko urua nanou. I a tia ni karaoa au berita nakon Iehova. Ibukini kakoroani bukina, I riai ni kanakoko bwa ko na beku n te umwanrianna ae tabu i Tiro.’ Ma e taku natina nakoina: ‘Tamau, ngkana ko a tia ni berita nakon Iehova, ao kakoroa bukina. N na tii butiiko bwa ko na kariaia ae N na kabanea uoua te namwakaina n taiani maunga ma raoraou aika aine. Ao I a nako imwina.’ E kakaonimaki ni beku natin Iebeta n te umwanrianna ae tabu ni kabane ana bong ni maiu. A kakawaria raoraona ni katoa ririki i Tiro.