Motushi Jeʼwaa naaʼin na israeliitakana nachikuaʼa, noʼttaka sünain aʼwaajaa tü maleiwayaasükalüirua. Wanaa sümaa nashutuin naaʼu na wayuu chajanakana Ammón, nnojoishii akaaliinjünüin sutuma tü maleiwayaasükalüirua. Müliashii maʼin naya atumawaa soʼu wainma juya. «Moto paaʼin waainjala Jeʼwaa. Jalia maa waya noulia na waʼünüükana», namakalaka mapa nümüin Jeʼwaa. Najaʼttiraka tü maleiwayaasükalüirua otta naʼwaajaka Jeʼwaa nachikuaʼa. Amülialaasü naaʼin Jeʼwaa naaliin.

Naneekaka na israeliitakana Jefté, wanee wayuu yalayala aaʼinchi sünain atkawaa. Niainjachi Jefté nekiipüʼüka sünain atkawaa namaa na ammoniitakana. Anuu nünüiki Jefté nümüin Jeʼwaa: «Müleka wakanajüle na waʼünüükana, taapeerü pümüin tü palajatkat wayuu apanapajakai taya tantapa tepialuʼumüin shiʼyataaiwa pümüin suluʼu tü piichi aʼwaajüleekat». Naapüin Jeʼwaa nünüiki Jefté otta nakanajuuka na naʼünüükana.

 Nüleʼejapa Jefté nipialuʼumüin, shia apanapajaka nia tü waneesüchonkat nüchon, ayonnajüsü shia otta atalejüsü pandereta nüpanapa. ¿Kaseetche naaʼinraka Jefté? Sotojaasü naaʼin tü nümakat Jeʼwaa nümüin. «Tachonchee, mojushaatasü taaʼin paaʼujee, taapüin tanüiki nümüin Jeʼwaa. Süpüla tekeraajüin tü tanüikikat, taluwataainjatü pia süpüla piʼyataainjatüin nümüin Jeʼwaa chaa Siló suluʼu tü aʼwaajüleekat», nümakalaka sümüin tü nüchonkot. Susoutaka tü nüchonkot: «Müleka paapüitpale pünüiki nümüin Jeʼwaa, pikeraaja shia. Shiajaʼa neʼe tachuntuin pümüin puuʼulaaiwa toʼunuin palajana sümaa taʼaleewainyuu saaʼumüin tü uuchikat soʼu piama kashi. Oʼuneerü taya mapa eere tü aʼwaajüleekat Maleiwa». Waneepiasü tü nüchonkot Jefté nümaa Jeʼwaa, aʼyataasü shia suluʼu tü aʼwaajüleekat süpüla kaʼikat süpüshuaʼa. Oʼunawaishii juyawai na saʼaleewainkana sünain anaʼlawaa sümüin.