Aisiraeli nĩ maatigire kũhoya Jehova o rĩngĩ na makĩambĩrĩria kũhoya ngai cia mĩhianano. Rĩrĩa Aamoni maatharĩkĩire Aisiraeli na makĩmatooria, ngai icio cia maheeni itiamateithirie. Kwa ihinda rĩa mĩaka mĩingĩ, Aisiraeli nĩ maahinyĩrĩirio mũno. Mũthia-inĩ meerire Jehova ũũ: ‘Nĩ tũhĩtĩtie. Twagũthaitha ũtũhonokie kuuma kũrĩ thũ citũ.’ Nĩ maanangire mĩhianano yao na makĩambĩrĩria kũhoya Jehova rĩngĩ. Jehova ndeendaga kuona magĩthiĩ na mbere kũhinyĩrĩrio.

Mũndũ ũmwe warĩ na hinya wetagwo Jefitha nĩ aathurirũo gũtongoria andũ nĩguo mathiĩ makahũre Aamoni. Eerire Jehova ũũ: ‘Angĩkorũo nĩ ũgũtũteithia kũhootana mbaara ĩno, ndehĩta ndoiga rĩrĩa ngacoka mũciĩ, nĩ ngaakũhe mũndũ ũrĩa ũkoima  nyũmba yakwa arĩ wa mbere okĩte kũndũnga.’ Jehova nĩ aaiguire mahoya ma Jefitha na akĩmũteithia kũhootana mbaara ĩyo.

Rĩrĩa Jefitha aacokire mũciĩ, mũndũ ũrĩa warĩ wa mbere kũmũtũnga aarĩ mũirĩtu wake, na ndaarĩ na mwana ũngĩ tiga ũcio. Aamũtũngire agĩthũngũthaga akĩinagia manyanga. Jefitha angĩekire atĩa? Aaririkanire mwĩhĩtwa wake harĩ Jehova na akiuga: ‘Mwarĩ wakwa! Nĩ wanjũraga ngoro mũno. Harĩ ũndũ ndĩrerĩire Jehova, na nĩguo ũhinge no mũhaka ndeke ũthiĩ Shilo ũgatungate nyũmba-inĩ yake.’ No mũirĩtu wake aamwĩrire ũũ: ‘Baba, akorũo nĩ ũrehĩtire harĩ Jehova, no mũhaka ũhingie ũndũ ũcio. Ũrĩa ngwenda no ũreke thiĩ irĩma-inĩ mĩeri ĩĩrĩ nĩguo ngahũthĩre mahinda na airĩtu arata akwa. Thutha ũcio nĩ ngathiĩ.’ Mũirĩtu ũcio wa Jefitha aatungatĩire Jehova thĩinĩ wa nyũmba yake arĩ mwĩhokeku ũtũũro-inĩ wake wothe. Arata ake nĩ maathiaga Shilo o mwaka kũmũcerera.