Akua Izalaiele a mateka kubheza jinzambi ja makutu, iá a xisa o ubhezelu ua kidi. Kioso akua Amone kia luu o ita ni akua Izalaiele, o jinzambi jenhojo ja makutu ka bhange kima phala kukuatekesa akua Izalaiele. Ku mivu iavulu, akua Izalaiele a tale hadi iavulu. Mu kusuka-ku, ene ambela Jihova: ‘Etu tua te kituxi. Tua ku dióndo, tu bhulule bhu maku a jinguma jetu.’ Akua Izalaiele a bulu o iteka ioso, anga a mateka dingi kubheza Jihova. Jihova ka mesenene kua mona kubhita ni hadi ienióio.

Sai diiala a mu ixana Jefete, a mu solo phala kutuamena akua Izalaiele mu ita, ni akua Amone. Muene uambe kua Jihova: ‘Se u tu kuatekesa kutolola o ita íii, ngi ku kanena kuila, kioso ki nga-nda vutuka kubhata diami, o muthu u diangela ku ngi sangesa nga-nda ku bhakuila-nê.’ Jihova ua tambuijila o musambu ua  Jefete, anga ua mu kuatekesa kutolola o ita.

Kioso Jefete kia bhixila kubhata diê, o muthu ua diangela ku mu sangesa, uexile mon’ê ua muhatu, umoxi-élele. O mon’â Jefete ua kexile mu kina ni kuxika ngoma. Ihi ieji bhanga Jefete? Muene ua lembalala o kikanenu kiê, iu uambe: ‘Aiué, mon’ami, tata! Eie ua ngi katesa o muxima. Nga kanena Jihova. Phala ku kumbidila o kikanenu kiki, nga tokala ku kutumikisa phala kusidivila Jihova mu balaka ia kutakanena, mu mbanza ia Silo.’ Maji mon’ê ua muambela uixi: ‘Tata, se ua kanena Jihova, eie ua tokala u kumbidila o kikanenu kiê. Nga ku dióndo, ngi bhane ngó mbeji jiiadi phala ngi nhunge ni makamba mami ku milundu. Anga ngiiami kiá.’ O mon’â Jefete ua sidivila Jihova ni ufiiele uoso mu balaka ia kutakanena, ku muenhu uê uoso. Mivu ni mivu, o makamba mê a kexile mu mu kunda, mu mbanza ia Silo.