Di Izrɛlayt dɛn bin lɛf Jiova bak ɛn bigin fɔ wɔship lay lay gɔd dɛn. We di Amɔnayt dɛn bin kam atak ɛn fɛt di Izrɛlayt dɛn, dɛn lay lay gɔd dɛn de nɔ bin du natin fɔ ɛp dɛn. Fɔ lɔng tɛm, di Izrɛlayt dɛn bin de sɔfa. Dɔn dɛn tɛl Jiova se: ‘Wi dɔn sin. Duya sev wi frɔm wi ɛnimi dɛn.’ Di Izrɛlayt dɛn bin pwɛl pwɛl dɛn aydɔl dɛn ɛn bigin fɔ wɔship Jiova bak. Jiova nɔ bin want fɔ kɔntinyu fɔ si we dɛn de sɔfa.

Dɛn bin pik wan fɛtman we nem Jɛfta fɔ lid di pipul dɛn fɔ go fɛt di Amɔnayt dɛn. I tɛl Jiova se: ‘If yu ɛp wi win dis fɛt, a prɔmis yu se we a kam bak na os, a go gi yu di fɔs pɔsin we de kɔmɔt insay mi os fɔ kam mit mi.’ So Jiova bin lisin to Jɛfta in prea, ɛn i ɛp am fɔ win di fɛt.

 We Jɛfta bin kam bak na os, di fɔs pɔsin we bin kam fɔ mit am na in galpikin, in na di wangren pikin we i gɛt. I bin de dans ɛn ple tamborin. Wetin Jɛfta go du? I mɛmba in prɔmis ɛn se: ‘E mi pikin! Yu dɔn mek mi at dɔn pwɛl. A mek wan prɔmis to Jiova. Fɔ du wetin a dɔn prɔmis, a fɔ sɛn yu fɔ go sav na di tabanakul na Shaylɔ.’ Bɔt in galpikin tɛl am se: ‘Papa, if yu dɔn mek prɔmis to Jiova, yu fɔ du wetin yu dɔn prɔmis. Di wangren tin we a want na fɔ de wit mi uman padi dɛn na di mawntin fɔ tu mɔnt. Afta dat, a go go.’ Jɛfta in galpikin bin kɔntinyu fɔ sav na di tabanakul te i day. Ɛni ia, in padi dɛn bin de go na Shaylɔ fɔ go fɛn am.