ပှၤ​အံၣ်စရ့လး​ဖိ​တဖၣ် ပာ်တ့ၢ်​ကွံာ် ယဟိဝၤ​ယွၤ​လၢ​အသီ​တဘျီ ဒီး​ဘူၣ်ထီၣ်​ဘါထီၣ်​ဝဲ ယွၤ​လၢ​အ​ကမၣ်​တဖၣ်​လီၤ. ဖဲ​ပှၤ​ဧၣ်မိၣ်​ဖိ​တဖၣ်​ဟဲ​ဒုး​ပှၤ​အံၣ်စရ့လး​ဖိ​အခါ ယွၤ​လၢ​အ​ကမၣ်​တဖၣ်​အံၤ မၤစၢၤ​အဝဲသ့ၣ်​တ​သ့​ဘၣ်. ပှၤ​အံၣ်စရ့လး​ဖိ​တဖၣ် ဘၣ်နး​ဘၣ်ဖှီၣ်​ယံာ်ဝဲ​အ​နံၣ်​အါမး​လံ. လၢခံ​န့ၣ် အဝဲသ့ၣ်​တဲဘၣ်​ယဟိဝၤ​ယွၤ​လၢ– ‘ပ​မၤ​ကမၣ်​ဘၣ်​နၤ​လံ. ဝံသးစူၤ​မၤ​ပူၤဖျဲး​ပှၤလၢ ပဒုၣ်​ပဒါ​အစုပူၤ​တက့ၢ်.’ ပှၤ​အံၣ်စရ့လး​ဖိ​တဖၣ် မၤ​ဟးဂီၤ​ကွံာ် အ​တၢ်ဂီၤ​တၢ်ဖှီၣ်​တဖၣ် ဒီး​စးထီၣ်​ဘူၣ်ထီၣ်​ဘါထီၣ်​က့ၤ ယဟိဝၤ​ယွၤ​လီၤ. ယဟိဝၤ​ယွၤ​တ​အဲၣ်ဒိး​ထံၣ်ဝဲ​လၢ အဝဲသ့ၣ် က​တူၢ်ဘၣ်​တၢ်နး​တၢ်ဖှီၣ်​လၢၤဘၣ်.

ပှၤသုးဖိ​တဂၤ​လၢ​အ​မံၤ​မ့ၢ် စီၤ​ယံးဖသၤ​န့ၣ် ဘၣ်​တၢ်​ဃုထၢ​ထီၣ်​အီၤ​လၢ က​ကဲခိၣ်​ကဲနၢ်​လၢ ပှၤ​အံၣ်စရ့လး​ဖိ​အ​ဖီခိၣ် ဒ်သိး​က​ဒုးတၢ်​ဒီး​ပှၤ​ဧၣ်မိၣ်​ဖိ​တဖၣ်​အဂီၢ်​လီၤ. အဝဲ​တဲဘၣ်​ယဟိဝၤ​ယွၤ​လၢ– ‘န​မ့ၢ်​မၤစၢၤ​ပှၤလၢ ပ​က​မၤနၢၤ​တၢ်ဒုး​အံၤန့ၣ် ယ​အၢၣ်လီၤ​နၤ​လၢ ဖဲ​ယ​ဟဲက့ၤ​တုၤလၢ​ဟံၣ်​အခါ ပှၤလၢ​အ​ဟဲ​သဂၢၢ်​ယၤ အဆိ​ကတၢၢ်​တဂၤ​န့ၣ် ယ​က​ဟ့ၣ်လီၤ​နၤ​လီၤ.’ ယဟိဝၤ​ယွၤ  ဒိကနၣ်​ဝဲ​စီၤ​ယံးဖသၤ အ​တၢ်​ထုကဖၣ်​ဒီး​မၤစၢၤ​အီၤ​လၢ အ​က​မၤနၢၤ​တၢ်ဒုး​အဂီၢ်​လီၤ.

ဖဲ​စီၤ​ယံးဖသၤ ဟဲက့ၤ​လၢ​ဟံၣ်​အခါ ပှၤလၢ​ဟဲ​သဂၢၢ်​အီၤ​အဆိ​ကတၢၢ်​တဂၤ​န့ၣ် မ့ၢ်​အ​ဖိမုၣ်​လီၤ. စီၤ​ယံးဖသၤ​န့ၣ် အဖိ​အိၣ်​ထဲ​တဂၤဧိၤ​လီၤ. ဖဲ​အ​ဖိမုၣ်​အံၤ ဟဲ​သဂၢၢ်​အီၤ​အခါ ဂဲၤကလံၣ်​ဒီး​ပှီၢ်​ဝဲ​ဒၢ​လီၤ. ဖဲ​စီၤ​ယံးဖသၤ​ထံၣ်ဘၣ် အ​ဖိမုၣ်​အခါ အဝဲ​မၤဝဲ​ဒ်လဲၣ်. အဝဲသ့ၣ်​နီၣ်ထီၣ်က့ၤ အ​တၢ်​အၢၣ်လီၤ​အီလီၤ ဒီး​တဲဝဲ​လၢ– ‘အၣ်လါ, ယ​ဖိမုၣ်​ဧၢ, န​မၤသ့ၣ်ဖး​ယ​သး​လံ. ယ​အၢၣ်လီၤ​တၢ်​ဒီး​ယဟိဝၤ​ယွၤ​အဃိ ယ​က​ဘၣ်​မၤ​လၢပှဲၤ​အီၤ​လီၤ. ယ​အၢၣ်လီၤ​လၢ ပှၤလၢ​အ​ဟဲ​သဂၢၢ်​ယၤ အဆိ​ကတၢၢ်​တဂၤ​န့ၣ် အဝဲ​က​ဘၣ်​မၤတၢ်​လၢ ဒဲစီဆှံ​လၢ​ဝ့ၢ်ၡံလိၤ​အ​ပူၤ​လီၤ.’ ဒီး​စီၤ​ယံးဖသၤ​အ​ဖိမုၣ် တဲဘၣ်​အီၤ​လၢ– ‘ယ​ပၢ်ဧၢ, တၢ်​လၢ န​အၢၣ်လီၤ​အီလီၤ​ဒီး ယဟိဝၤ​ယွၤ​န့ၣ် မၤထွဲ​အီၤ​သၢၣ်. ဘၣ်ဆၣ် ယ​ဃ့​နၤ​ထဲ​တမံၤ​လၢ န​က​ဟ့ၣ်​ယၤတၢ်​ဆၢကတီၢ်​ခံ​လါ​လၢ ယ​က​လဲၤ​ဟး​ဒီး​ယ​တံၤသကိး​ပိာ်မုၣ်​တဖၣ်​လၢ ကစၢၢ်​ခိၣ်​နီၤ. မ့ၢ်ဝံၤ​န့ၣ် ယ​က​လဲၤ​မၤတၢ်​လၢ​ဒဲစီဆှံ​လီၤ.’ စီၤ​ယံးဖသၤ​အ​ဖိမုၣ်​မၤတၢ်​လၢ ဒဲစီဆှံ​အ​ပူၤ​တစိၤ​လၢ​အသး​လီၤ. ကိးနံၣ်ဒဲး​န့ၣ် အ​တံၤသကိး​တဖၣ် ဟဲဟး​အိၣ်သကိး​အီၤ​လၢ ဝ့ၢ်ၡံလိၤ​အ​ပူၤ​လီၤ.