Kyaj kytzaqpiʼn aj Israel juntl maj Jehová ex e ok ten kʼulil kywitz dios nya ax tok. Noqtzun tuʼnj, aʼyeju dios lu mintiʼ e kolin kyiʼj tej kyok lipen aj Ammón kyiʼj. Toj nimku abʼqʼi ikʼx nya bʼaʼn kyuʼn aj Israel. Xi kyqanin onbʼil te Jehová: «Ma qo bʼinchane il. Najsama, qo tkloma kyiʼj qe aj qʼoj». Kubʼ kyxiten aj Israel qe tilbʼilal ex e ok ten juntl maj kʼulil te Jehová. Tuʼntzun jlu, tzaj qʼaqʼin tkʼuʼj Jehová kyiʼj.

Kyjuʼtzun jaw kyjyoʼn aj Israel jun nejenel kyxol aju soldad Jefté tbʼi. Atoq kbʼel nej kywitz toj qʼoj kyukʼil aj Ammón. Xi tqʼamaʼn Jefté jlu te Jehová: «Qa ma qo tzaj tonina tuʼn kykubʼ aj qʼoj lu quʼne, kxel ntziyene teya qa kxel nqʼoʼne aju tnejel xjal kʼeletz kʼamol weye aj nmeltzʼaje njaye». Tzaj tbʼiʼn Jehová aju tnaʼj  Dios Jefté ex tzaj tonin tuʼn tkubʼ kyiʼj aj qʼoj tuʼn.

Tej tmeltzʼaj Jefté tja, aju tnejel xjal etz kʼamolte aju tmeʼl, moqa tmyal. Aju oʼkxku jun tmeʼl. Etz in bʼixintoq wen ex in chimbʼantoq tiʼj pandereta. ¿Tiʼtoq kbʼantel tuʼn Jefté jaʼlo? Tzaj tnaʼn aju xi ttziyen ex tqʼama: «¡Ay nmeʼjel! Nimxix nbʼise ma tzaj tuʼna. At jun tiʼ o txi ntziyene te Jehová, ex tuʼn tjapun wuʼne il tiʼj tuʼn t-xi nsamaʼna ajbʼel toj ja xbʼalun toj Siló». Xi ttzaqʼweʼn tmeʼl te: «Tat, qa ma txi ttziyena jlu te Jehová, il tiʼj tuʼn tjapun tuʼna. Oʼkx kxel nqanine teya tuʼn ttzaj tqʼoʼna kabʼe xjaw weye tuʼn nxiʼye bʼetel kyukʼil wamiwe kywiʼ qe witz. Aj tbʼant jlu wuʼne, ok chin xeʼle toj ja xbʼalun». Kukx ajbʼen tmeʼl Jefté te Jehová ex xiʼ ajbʼel toj ja xbʼalun toj tkyaqil tanqʼibʼil. Tkyaqil abʼqʼi in cheʼxtoq tamiw keʼyilte toj Siló.