Israelitas oksepa kielkaujkej Jiova uan peuak kinueyichiuaj tiotsitsin. Sayoj ke nejon tiotsitsin amo kinmatampauiayaj keman akin kayomej Ammón kintajyouiltiayaj. Israelitas tajyouijkej miak xiujmej. Yejua ika, kiluijkej Jiova: “Titajtakojkej. Ika kualtakayot, xitechmakixti maj amo techtajyouiltikanok akin techtauelitaj”. Israelitas kinixpolojkej tiotsitsin uan oksepa peuak kiueyichiuaj Jiova. Yejua ika, yejuatsin amo ueliaok kiitaya maj kisentokanij tajyouianij.

Israelitas kiixpejpenkej se tateuijkej akin monotsaya Jefté. Yejua kinixyekanaskia keman moteuiskiaj iniuan akin kayomej Ammón. Jefté kiluij Jiova: “Komo titechpaleuia maj titatanikan, nimotenkaua ke nimitsmaktilis akin yekinika kisas nochan uan nechnamikikiuj keman nimokepas”. Jiova kikakik Jefté uan kipaleuij maj tatani.

 Keman Jefté mokepak ichan, akin yekinika kinamikito katka isiuapil, akin ipa setsin katka. Isiuapil mijtotijtiualaya uan kikakistiltiaya pandereta. ¿Uan axkan toni kichiuaskia Jefté? Kielnamikik tein motenkauak uan kijtoj: “¡Amo, nosiuapiltsin! Nechtelyolkokoua. Nikchiuak se netenkaualis iuan Jiova uan yejua ika moneki nimitstitanis xitekititi itech tabernáculo ompa Siló”. Isiuapil kinankilij: “Paj, komo timotenkauak nejon iuan Jiova, moneki tikchiuas. Sayoj nimitstajtania xinechkaua maj niyouj tepemej ome metsti iniuan notasojikniuan. Keman nimokepas, niyas tabernáculo”. Isiuapil Jefté amo keman kikauak Jiova uan tekitik itech tabernáculo nochi inemilis. Uan itasojikniuan yayaj kikalpanotij nochi xiujmej ompa Siló.