VaIziraeri vakasiazve kunamata Jehovha zve vakatanga kunamata zvimwari zvo manyepo. VaAmoni povakahwisa vaIziraeri, zvimwari zvese zviya azvizivi kuita ciri cese kuti zvivabesere. VaIziraeri vakatambujika, ko makore mazinji. Pakupejisira ivona vakabvunja Jehovha kudari: ‘Takamushaishira. Tapota tiponesenyi ku vavengi vedu.’ VaIziraeri vakaphwanya zvidhori zvavo zve vakatanga kushandira Jehovha nga papsa. Jehovha aacaidepi kuvavona vecitambujika.

Umwe muhwi waizwi Jefita wainga wasanwa kuti atungamirire vandhu ku hondo no vaAmoni. Iyena wakati kuna Jehovha: ‘Kudari mukatibesera pa hondo iyi, ndinomugondesa kuti pandinohwirira kumuzi, ndinomupa mundhu wokutanga anoviya kondiashira.’  Jehovha wakazwa mukumbiro wa Jefita zve wakamubesera kuti awine pa hondo iyi.

Jefita paakahwirira kumuzi, mundhu wokutanga wakaviya komuashira wainga mwana wake wokaji, umwe ega. Iyena waitamba zve acirija tambori. Jefita wakaitenyi? Iyena wakaceukija cigondiso caainga akaita zve wakati: ‘Oh haiwa, mwana wangu! Wakhuvaza mwoyo wangu. Ndaita cigondiso kuna Jehovha. Kuti ticikwanirise, ndinodikana kukutumira ku tabherinaki kuti ushandire Shiro.’ Asi mwana wake wakamubvunja kuti: ‘Baba, kudari makaita cigondiso kuna Jehovha, munodikana kucikwanirisa. Zvandingamukumbira pa zvese i kupeja mweji muviri ku matundhu no shamwari jangu. Perepo ndinozoenda.’ Mwana wa Jefita wakashandira mu tabherinaki mu upenyu hwake hwese. Mu makore ese, shamwari jake jaienda komuvona.