Aaisraeli oya li yi iteka po ishewe Jehova noya tameke okulongela iikalunga. Iikalunga mbyoka kaya li ye ya kwathele, sho Aayammoni ye ya ponokele noye ya kondjitha. Aaisraeli oya kala uule womimvo taya mono iihuna. Hugunina, oya lombwele Jehova ya ti: ‘Otwa yono kungoye. Tu hupitha kaatondi yetu.’ Aaisraeli oya hanagula po iikalunga yawo noya tameke ishewe okulongela Jehova. Jehova ka li a hala oku ya mona taya mono iihuna.

Ependafule lyedhina Jefta olya hogololwa li wilike oshigwana molugodhi lwokukondjitha Aayammoni. Jefta oku uvanekele Jehova a ti: ‘Ngele oto tu kwathele molugodhi nduka, otandi uvaneke kutya ngele nda shuna kegumbo, otandi ke ku pa omuntu ngoka ta zi maandjetu tango te ya okutsakaneka ndje.’ Jehova okwa pulakene  egalikano lyaJefta nokwe mu kwathele molugodhi.

Sho Jefta a galukile kegumbo, omuntu ngoka a zi mo tango e ya oku mu tsakaneka okwa li omwanakadhona, epona. Okwa li ta tembula nenge ta dhana ye ta hiki ontunda. Mbela Jefta okwa li ta ka ninga po shike? Okwa dhimbulukwa euvaneko lye  nokwa ti: ‘O, mumwandje! Owa tatula omutima gwandje! Onda ninga euvaneko kuJehova, opo ndi li gwanithe po, ondi na oku ku tuma wu ka longe ketsalihangano kuShilo.’ Ihe omwanakadhona okwe mu yamukula a ti: ‘Tate, ngele owa ninga euvaneko kuJehova, owu na oku li gwanitha po. Otandi ku pula owala wu pe ndje manga oomwedhi mbali, ndi ye nookuume kandje koondundu. Opo ihe otandi ka ya.’ Omwanakadhona gwaJefta okwa longele Jehova nuudhiginini metsalihangano onkalamwenyo ye ayihe. Omumvo kehe, ookuume ke oya li haye ke mu talela po kuShilo.