Ízrel dineʼé éí Jiihóvah baa náá dajiyooznahgo edaʼalyaii dazhdósingo baa nináájíkai. Áman dineʼé hakʼiijéeʼgo edaʼalyaii bichʼįʼ nidahojiłá yę́ę tʼáadoo háká ííjéeʼ da. Áko Ízrel dineʼé tiʼdahojooníihgo ląʼí nááhai. Hajoobáʼí go hoł hooʼaʼgo índa Jiihóvah ádabijiní: ‘Nichʼįʼ ádił nidaʼayeelzííʼ, tʼáá shǫǫdí anaʼí bitsʼąą yisdánihínííł.’ Áko Ízrel dineʼé éí edaʼalyaii ałtso adeidiyiiskʼą́ą́ʼ, áadi índa Jiihóvah deidósingo yaa nídiikai. Jiihóvah éí doo tiʼdahojooníih da doo hóʼní.

Áman dineʼé bikʼiizhdoojah biniyé hooʼish doogo, Jéfthah naabaahii nilı̨́įgo, nídazhdiiłtı̨́. Jéfthah éí Jiihóvah ííłní: ‘Akʼeh dadeedlı̨́įʼgo éí shighandi nánísdzáago tsʼídá áłtsé shichʼįʼ chʼíníyáhígíí naa deeshtééł.’ Jiihóvah hodiiztsʼą́ąʼgo háká  eelwodgo Áman dineʼé bikʼeh dazhdeesdlı̨́ı̨́ʼ.

Jéfthah hooghandi nádzáago, tsʼídá áłtsé hachʼįʼ chʼélwodígíí éí hatsiʼ. Tʼáá éí tʼéí hweʼawééʼ. Hatsiʼ éí tambourine yee naanéego áádóó alzhishgo hadááh yílwod. Áko Jéfthah haajiidzaa? Bee ádee hajoodzííʼ yę́ę bééjoolniiʼgo ájíní: ‘Dooládóʼ dooda da, shitsiʼ nílíinii, ayáhígo áshiinilaago biniinaa tʼáá íiyisí shichʼįʼ hodiiznááʼ, háálá Jiihóvah bichʼįʼ ádee haasdzííʼ yę́ę kʼad doo łahgo ánáoshdleʼ átʼée da.’ Ákótʼée ndi hatsiʼ áháłní: ‘Shizhéʼé, Jiihóvah bichʼįʼ ádee háínídzíʼígíí tʼáá ákótʼée doo. Shí éí tʼáá áłtsʼíísígo ádá yíníshkeed. Shíniʼdii dziłghą́ąʼdi shikʼis bił honishłǫ́ǫgo naaki shee nídidooził. Áádę́ę́ʼ nánísdzáago índa tabernaclegóó deeshááł.’ Tʼáá nináháhááh bikʼeh hakʼis tabernacledi haa nídaakah ńtʼééʼ. Jéfthah bitsiʼ tabernacledi Jiihóvah yá naalʼaʼgo abíyííłką́.