Ova Isilayeli vayekelepo okuumbila Jeova avafende ono huku mbomatutu. Etyi ovanthu vo ko Amo veya okuluisa ova Isilayeli, ovikahuku avihevekuatesako. Ova Isilayeli vamuene ononkhumbi mokueenda kuomanima omanyingi. Konyima avapopila Jeova okuti: ‘Etyi tualinga katyaviukile. Mbambavo tuyovolevo konondyale mbetu.’ Ova Isilayeli avahanyepo ovikahuku viavo avahimbika vali okufenda Jeova. Jeova kahandele vatualeko nokumona ononkhumbi.

Avaholovona efualali litiwa o Jefete opo valuise ovanthu vo ko Amo. Jefete apopila Jeova okuti: ‘Inkha unkhuatesako andyifindi ovilwa, tyina ndyikondoka keumbo, omunthu wotete matundu meumbo opo andyakule mankhuavelae.’ Jeova weiva  elikuambelo lia Jefete emukuatesako okufinda.

Etyi Jefete akondoka keumbo, omunthu wotete wemuyakula omona wae omuhikuena, ankho enae vala aike. Ankho ukahi nokunyana otyo ahika okañgoma. Oityi Jefete alinga? Wahinangela omulao alinga iya ati: ‘Tatie mona wange! Ove wantheya omutima. Ame nalinga omulao ku Jeova. Moluotyo mandyikutumu opo ukaundape mekaka liefendelo ko Siloo.’ Mahi omona apopila He okuti: ‘Tate, ankho walinga omulao ku Jeova, ufuisapo. Mahi nkhele ndyeke ndyikakale onohanyi onombali ko nomphunda nomapanga ange. Ati upondola okuenda.’ Omona wa Jefete aundapa mekaka liefendelo mokueenda kuomuenyo wae auho. Momanima aeho omapanga ae ankho ekemutalelapo ko Siloo.