Abaisraeli bakagaruka baaruga ahari Yehova kandi baatandika kuramya baaruhanga b’ebishuba. Obu Abaamoni baataahirira Abaisraeli kandi bakabarwanisa, baaruhanga abo ab’ebishuba tibarabajunire. Kumara emyaka mingi, Abaisraeli bakabonabona. Bwanyima bakagira Yehova bati: ‘Tusiisire. Twakweshengyereza tujune abazigu baitu.’ Abaisraeli baakacwekyereza ebishushani ebi baabaire nibaramya kandi baagaruka batandika kuramya Yehova. Yehova akaba atarikwenda kuguma naareeba barikubonabona.

Omurwani orikumanywa nka Yefusa akatooranwa kwebembera abantu omu rugamba kurwanisa Abaamoni. Akagira Yehova ati: ‘Ku orampe obusinguzi omu rugamba oru, nindaganisa ngu ku ndaagarukye omuka, omuntu oraabanze kushohora kuruga omu nju yangye kumbugana niinyija kumukuha.’ Yehova akahurira okushaba  kwa Yefusa kandi yaamuhwera kusingura orugamba.

Yefusa ku yaagarukire omuka, omuntu owaabandize kwija kumubugana akaba ari omuhara, omwana we wenka. Akaba naateera ekitaasa kandi arikuzina. Yefusa akaba naija kukora ki? Akaijuka okuraganisa kwe kandi yaagira ati: ‘Ai bambe, mwana wangye! Ka wangwisiza akagwe! Nkaraganisa Yehova. Kubaasa kuhikiiriza okuraganisa oku, niinyija kukwohereza kuheereza omu ihema omuri Shiilo.’ Kwonka omuhara akamugira ati: ‘Taata, ku oraabe oraganiise Yehova, oine kukihikiiriza. Niinkushaba onyikirize ameezi abiri, nze omu bibungo na banywani bangye, reero mbone kugyenda.’ Muhara wa Yefusa akaza kuheereza aha ihema ebiro by’amagara ge goona. Buri mwaka, banywani be bakaba baza Shiilo kumutaayaayira.