Yizilayɛma eza dele Gyihova anwo atua na bɛhɔzonlenle awozonle. Mekɛ mɔɔ Amɔnoma vale konle doale bɛ la, awozonle ɛhye mɔ biala angola anlie bɛ. Yemɔti Yizilayɛma nwunle amaneɛ ɛvolɛ dɔɔnwo. Akee bɛzele Gyihova kɛ: ‘Yɛyɛ ɛtane. Yɛsɛlɛ wɔ die yɛ fi yɛ agbɔvolɛ asa anu.’ Yizilayɛma zɛkyele bɛ abaaba ne mɔ na bɛziale bɛzonlenle Gyihova. Yemɔti ɛnee Gyihova ɛngulo kɛ bɛnwu amaneɛ bieko.

Gyihova kpale Gyɛfeta mɔɔ ze konle nye zo kpalɛ la ɔmaanle ɔlile ye menli ne anyunlu na bɛhonle bɛtiale Amɔnoma. Ɔzele Gyihova kɛ: ‘Saa ɛmaa yɛdi konim wɔ konle ɛhye anu na mesia meba sua nu a, awie biala mɔɔ kɛlimoa kɛvi me sua nu ɛkɛ ne kɛvinde kɛ ɔbayia me la le wɔ ɛdeɛ.’ Gyihova diele Gyɛfeta  asɔneyɛlɛ ne na ɔboale ye ɔmaanle ɔlile konim.

Mɔɔ Gyɛfeta ɛlɛba sua nu la, ɔ ra raalɛ kokye mɔɔ ɔlɛ la a rayiale ye a. Ɛnee ɔlɛ akɛya ɔ sa nu na ɔlɛbɔ yeazi agole. Duzu a Gyɛfeta bayɛ a? Ɔhakyele ye ɛwɔkɛ ne na ɔhanle kɛ: ‘O me ra raalɛ ye! Wɔde me ɛbolɛ! Mebɔ Gyihova ɛwɔkɛ na ɔwɔ kɛ medi zo. Ɔwɔ kɛ ɛkɔsonle wɔ ɛdanlɛsua ne anu wɔ Hyaelo.’ Noko, ɔ ra raalɛ ne zele ye kɛ: ‘Egya, mebayɛ kɛ mɔɔ wɔbɔ Gyihova ɛwɔkɛ la, debie ko a mekpondɛ kɛ ɛyɛ a, maa mengɔ me gɔnwo mɔ mbɛlɛra anwo wɔ awoka ne mɔ azo siane nwiɔ na akee meahɔ.’ Gyɛfeta ara raalɛ ne lile nɔhalɛ zonlenle wɔ ɛdanlɛsua ne anu wɔ ye ngoane mekɛ kɔsɔɔti anu. Ɛvolɛ biala, ɛnee ɔ gɔnwo mɔ mbɛlɛra kɔkpɔla ye wɔ Hyaelo.