Israelïtakunaqa Jehoväta jaqirirmi mana rasumpa dioskunata yapë adorar qallëkuyarqan. Peru tsë dioskunaqa manam Ammon nunakunapita tsapäyaqtsu. Tsë nunakunaqa mëtsika watakunapam sufritsiyarqan. Tsëmi Jehoväta kënö niyarqan: “Qampa contrëkim jutsallakuyarqö. Chikiyämaqnïkunapita salvëkalläyämë”. Nïkurmi llapan imäginkunata ushakätsiyarqan y Jehoväta yapë adorayarqan. Tsëmi Jehoväqa alläpa sufriyanqanta rikar ankuparqan (llakiparqan).

Israelïtakunaqa Ammon nunakunawan guërrata rurayänampaq y dirigeqninkuna kanampaqmi pelyëta alli yachaq Jeftëta akrayarqan. Jeftëqa Jehovätam kënö nirqan: “Kë guërrachö venciyänäpaq yanapayämaptikiqa, wayïta kutikaptï chaskimaqnï  puntata yarqamoq kaqtam qamta qoykushqëki”. Jehoväqa Jeftë mañakunqanta wiyarmi guërrachö venciyänampaq yanaparqan.

Wayinman chëkarnam Jeftëqa rikärirqan llapankunapa puntanta jukllëlla warmi wamran yarqëkämoqta. Tushur y panderëtata tocar ëqikämoqtam rikärirqan. ¿Y imatataq Jeftëqa tsë höra yarpärirqan? Jehoväta äninqantam. Tsëmi kënö nirqan: “¡Ay wamrallä! ¿Imanirtaq shonqüta nanatsimunki? Kananqa Jehoväta äninqäta cumplirmi pëta sirwinëkipaq carpa wayinman qamta pushanaq”. Tsënam wamranqa kënö nirqan: “Pä, Jehoväta änishqa këkarqa cumplinëkim. Imallam sïqa, yanasäkunawan ishkë killapa jirkakunata ëwarilläshaq. Tsëpita kutiramurmi Diospa carpa wayinman ëwashaq”. Jeftëpa warmi wamranqa llapan kawëninchömi mana jaqirishpa Jehoväta sirwirqan. Y yanasankunaqa wata watam pëta watukaq Silöman ëwayaq.