O Izraelcija paljem mukhlje e Jehova hem počmindže te služinen e hovavne devljendže. Ked o Amoncija napadindže e Izraelcen, o hovavne devela naštindže te pomožinen ljendže. O Izraelcija but berša patindže. Ko krajo phendže e Jehovase: „Grešindžam. Molinaja tut, spasin amen ando amare dušmanja.“ Tegani, o Izraelcija uništindže pe idolen hem počmindže paljem te služinen e Jehovase. O Jehova naštindža više te dikhel ljen sar patinena.

O Jehova birindža jekhe vojniko, kova vičindža pe Jeftaj, te vodini e narodo ko maribe protiv o Amoncija. Ov phendža e Jehovase: „Ako ka pomožine amen te pobedina ko akava maribe, ked ka irinav man čhere prvo kova ka ikljol ando mo čher, ka dav  lje tuče.“ O Jehova šundža e Jeftajesi molitva hem pomožindža ljese te pobedini.

Ked o Jeftaj irindža pe čhere, oljesi čhaj prvo ikljilji anglo ljeste. Oj hine oljesi jedinica. Oj čheldža hem bašaldža ko daire. Ked o Jeftaj dikhlja la, setindža pe ko po obećanje hem phendža lače: „O, mi čhaj! Morandiljan li prvo tu te ikljove anglo mande? Obećindžum diso e Jehovase hem te šaj te čerav odova mora te bičhalav tut ko sveto šator ko Silom.“ Ama, oljesi čhaj phendža ljese: „Mo dad, ako obećindžan diso e Jehovase valjani te ispunine odova. Samo mukh man prvo te džav duj masek ki planina me amaljinjencar. A palo odova ka džav ko Silom.“ E Jeftajesi čhaj verno služindža ko sveto šator dži ko krajo ando po dživdipe. Svako berš olake amaljinja dželje ko Silom te dikhen la.