Azo ti Israël akiri adö Jéhovah azia na ala komanse ti voro anzapa ti wataka. Na ngoi so azo ti mara ti Ammon aga ti tiri bira na azo ti Israël, anzapa ni so apeut ti sara ye oko ape ti aidé ala. Teti angu mingi, azo ti Israël abâ pasi. Ala bâ gbä ala tene na Jéhovah: ‘E sara siokpari. Pardon, sö e na maboko ti awato ti e.’ Azo ti Israël afuti ayanda ti ala ni na ala komanse ti voro Jéhovah. Jéhovah aye ti bâ ala na bango pasi encore ape.

A soro mbeni ngangu zo ti bira so iri ti lo ayeke Jephté ti mû li ni na yâ ti bira so azo ti Israël ayeke gue ti sara na azo ti Ammon. Lo tene na Jéhovah: ‘Tongana mo aidé mbi ti sö benda na yâ ti bira so, mbi mû zendo na mo so tongana mbi kiri na yanga-da, kozo zo so ayeke sigi na yâ ti da ti mbi ti ga ti yamba mbi, mbi yeke mû lo na  mo.’ Jéhovah amä sambela ti Jephté na Lo sara si lo sö benda na yâ ti bira ni.

Na ngoi so Jephté akiri na yanga-da, kozo zo so asigi ti ga ti yamba lo ayeke molenge ti lo ti wali, so ayeke oko molenge ti lo. Lo yeke dodo nga lo yeke pika tambourin. Jephté ayeke sara tongana nyen? Lo rappelé na zendo so lo mû, lo tene: ‘Aï, molenge ti mbi! Mo zia kota vundu na bê ti mbi. Mbi mû zendo na Jéhovah awe. Ti sara ye alingbi na ni, mbi doit ti tokua mo ti gue ti sara kua na yâ ti tabernacle na Shilo.’ Me molenge ni akiri tënë na lo, atene: ‘Babâ, tongana mo mû zendo na Jéhovah, a lingbi mo sara ye alingbi na ni. Ye so mbi hunda ayeke gï ti tene mo zia mbi gue mbi sara nze use na yâ ti ahoto, mbi na akamarade ti mbi ti wali. Na pekoni mbi yeke gue.’ Molenge ti Jephté ti wali asara kua be-ta-zo na yâ ti tabernacle na yâ ti tanga ti gigi ti lo kue. Ngu oko oko, akamarade ti lo ayeke gue na Shilo ti bâ lo.