Israeele xaano Yihowa agurte kaphu maganna magansiˈrate higgu. Amooni daga Israeelete manna gawajjitunna qassunsa yannara kaphu maganna horo dikaaˈlitinonsa. Israeelete daga lowo diro gadadinsoonninsa. Yannate gedensaanni insa Yihowa togo yitu: ‘Cubbo loonsoommo. Eeggatena baarigaarranke anganni gatisinke.’ Israeele kaphu magannansa hunte galagalte Yihowa magansidhu. Yihowa insa gadadaaˈmite heedhara dihasiˈrino.

Yihowa Israeele Amooni daga ledo olantara haaˈre haˈranno gede Yofitahe yinanni olamaancho doori. Yofitahe Yihowara togo yee qaale ei: ‘Amooni daga qeelleemmo gede kaaˈlittonkero, miniˈyara higeemmo woyite miniˈyanni haaˈraera fulannoha atera  eemmo.’ Yihowa Yofitahe huuccatto macciishshe olame qeelanno gede kaaˈlisi.

Yofitahe minisira higi woyite, iso haadhara balaxxe minisinni fultinoti beettosiiti; Yofitahera ise agurranna wole ooso dinosi. Ise kubbitanninna dibbe gantanni fultu. Yofitahe maa assinoro afootto? Isi Maganoho eino qaale qaage togo yii: ‘Baummo beettoˈya! Shettote aana tugittae. Yihowara qaale eoommo. Eoommo qaale wonshate ati Seelo katama hadhe qullaawu dunkaanira soqqamatta.’ Beettosi kayinni togo yitu: ‘Yihowara qaale eoottoha ikkiro, eootto qaale wonshi. Kayinnilla seennu jaallaˈya ledo ilaala haˈre lame agana hakko keeshsheemma gede fajjie. Hakkuyi gedensaanni haˈreemma.’ Yofitahe beetto lubbote noo geeshsha qullaawu dunkaanira Maganoho ammanante soqqantino. Diru dirunkunni jaallase Seelo katama hadhe laˈannose.