Niala tamy Jehovah ndraiky Israelita reo, le nivavaky tamy ndranahary diso. Tsy nahavita nanampy an-drozy ndranahary diso rey lafa nanafiky an-drozy ty Amonita. Nijaly avao rozy tanatini-tao maro. Farany rozy nitaray tamy Jehovah hoe: ‘Fa nanota taminao zahay. Mba vonjeo lahy zahay fa ampijalini- fahavalonay reo.’ Nitorotoroani-Israelita reo amy zay sampin- drozy rey, le nanompo ani-Jehovah ndraiky rozy. Tsy teani- Jehovah ty hahita an-drozy mijaly.

Nifily ani-Jefta Jehovah mba hitariky ani-vahoaky rey hialy amy Amonita. Nampitamà ani-Jehovah ie hoe: ‘Laha ataonao mandresy zahay, le hameako anao ze olo miboaky baka an- tranoko ao voalohany mba hitsena ahy.’ Nijanjinini-Jehovah ty vavakini-Jefta ka nataony nandresy rozy.

 Lafa noly amy zay Jefta, le anakampe- lany iny ro niboaky voalohany hitsena azy. Io raiky avao ty anakiny. Nitsinjaky ajà ampela io sady nititiky anakaponga. Hitanjaky ty safàny avao va Jefta? Mbo tiarony raha nampitamaniny iny ka nitaitsy biby ie nivola hoe: ‘Ninii! Ino lahy raha nataonao toy anakampelako? Fa nampitamà ani-Jehovah aho. Tsy maintsy halefako hanompo a Silo any zao iha henanikio.’ Le hoy anakampelany iny: ‘Baba, tsy manahy fa hataontsika zay, laha zay ty nampitamaninao ani-Jehovah. Fe mba engao tse aho hiaraky amy namako reo ho am-bohitsy eny roe vola, zay vo mandeha.’ Nanompo tamy tranolay masy ao zisiky farany anakampelani-Jefta iny sady tsy nivaliky. Nandeha namangy azy ta Silo any koa namany rey santao.