Na lē toe tapuaʻi foʻi tagata Isaraelu iā Ieova ae amata ona tapuaʻi i atua sesē. Ina ua osofaʻia e tagata Amoni tagata Isaraelu ma tau ma i latou, e leʻi mafai e na atua sesē ona fesoasoani iā i latou. Mo le tele o tausaga, na matuā mafatia tagata Isaraelu. O lea na latou talosaga atu ai iā Ieova: ʻUa matou agasala. Faamolemole laveaʻi i matou mai i o matou fili.’ Na faaleaga e tagata Isaraelu a latou tupua ma amata ona toe tapuaʻi atu iā Ieova. E leʻi fia silasila mai Ieova o faaauau pea o latou mafatiaga.

Sa iai se tagata toa e igoa iā Iefata, ma na filifilia o ia e taʻitaʻia tagata Isaraelu i le taua ma tagata Amoni. Na ia faapea atu iā Ieova: ʻPe afai e te fesoasoani mai iā i matou ina ia manumalo i le taua, ou te tautō atu pe a ou toe foʻi i loʻu aiga, o le tagata muamua e sau i fafo o lo  matou fale e faafeiloaʻi aʻu, ou te tuuina atu o ia iā te oe.’ Na faafofoga mai Ieova i le tatalo a Iefata, ma fesoasoani iā te ia ina ia manumalo i le taua.

Ina ua toe foʻi Iefata i lona aiga, o le tagata muamua na sau e faafeiloaʻi o ia o lona afafine. E na o le pau lea o lona alo. Na siva o ia ma tā le topa, o se meafaifaaili e tagitagi. O le ā le mea o le a fai e Iefata? Na ia manatua lana tautoga ma faapea ane: ʻAuē, loʻu afafine e! Ua e tuia loʻu fatu. Na ou faia se tautoga iā Ieova. Ina ia faataunuuina lenā tautoga, e tatau ona ou auina atu oe e auauna i le faleʻie paia i Sailo.’ Na tali mai lona afafine: ʻLoʻu tamā e, afai ua e tautō iā Ieova, ia e faia iā te aʻu e pei ona e tautō ai. E pau le mea ou te talosaga atu ai, ia tuu mai aʻu e matou te ō ma aʻu uō teine mo masina e lua i luga o mauga. Pe a uma lenā, ona ou alu ai lea i le faleʻie paia.’ Na auauna ma le faamaoni le afafine o Iefata i le faleʻie paia i lona olaga atoa. I tausaga taʻitasi, e ō atu ai ana uō e asi o ia i Sailo.