Den Israelsma gowe libi Yehovah baka èn den bigin anbegi falsi gado. Di den Amonsma kon feti nanga den, den falsi gado no ben man yepi den. Den Israelsma pina omeni yari langa. Te fu kaba, den taigi Yehovah: ’Wi sondu teige yu. Grantangi, frulusu unu fu den feanti fu wi.’ Den Israelsma puru den falsi gado na den mindri èn den go dini Yehovah baka. Yehovah no ben wani si moro fa den e pina.

A pipel teki wan tranga fetiman di nen Yefta fu tron legre-edeman te den ben o go feti nanga den Amonsma. Yefta taigi Yehovah: ’Efu yu yepi mi fu wini a feti disi, mi e pramisi yu taki te mi drai go na oso baka mi o gi yu a fosi sma di o komoto  na ini mi oso kon miti mi.’ Yehovah arki a begi fu Yefta èn a yepi en fu wini a feti.

Di Yefta drai go baka na oso, a fosi sma di kon miti en na en umapikin, en wan-enkri pikin. A ben e dansi kon miti en nanga tyengretyengre na ini en anu. San Yefta ben o du? A memre san a ben pramisi èn a taki: ’Ke mi umapikin. Luku fa yu e meki yu papa sari. Mi pramisi Yehovah wan sani. Èn efu mi wani du san mi pramisi, dan mi musu seni yu go na a tabernakel na Silo fu dini Yehovah.’ Ma na umapikin fu en taigi en: ’Papa, efu yu pramisi Yehovah wan sani, dan yu musu du san yu pramisi. Mi e begi yu nomo fu gi mi tu mun so taki mi kan go nanga den mati fu mi na den bergi. Baka dati mi o go.’ Na umapikin fu Yefta tan dini Yehovah en heri libi langa na a tabernakel. Ibri yari den mati fu en ben e go luku en na Silo.