Nanompo andrianagnahare diso indraike o Israelitao naho fa tafara tatoy. Faie tsy nagnampe iareo i andrianagnahare diso rey naho fa nialy amy iareo o Amonitao. Fa an-tao’e maro iareo ro nijale, hafara’e nipay fagnampeagne tamy i Jehovah. Hoe iareo: ‘Fa nanota tama’o zahay. Avoto zahay fa ampijalé o fahavalo’ay reo.’ Nipotehe o Israelitao iaby ty sampi’e, le nivavake tamy i Jehovah indraike iareo. Nahaferenaigne i Jehovah iareo.

I Jefta ty maramila finily, hitarike o Israelitao hialy amo o Amonitao. Nanao vava tamy i Jehovah reke tie: ‘Naho ampea’o handrese zahay, le homeiko azo ze ndaty manalaka ahy voaloha’e boake an-tragnoko ao.’ Namale ty vavake nanoe i Jefta ty Jehovah.

 Naho fa noly ty Jefta, le i anak’ampela’e bakotokagney ty nanalaka aze voaloha’e. Nitsinjake sady nijera langorogne reke. Tsiaro i Jefta i vava nanoe’ey, le hoe reke: ‘Hoy abey! Manahelo mafe raho. Nanao vava tamy i Jehovah raho, le tsy maintsy alefako ho a Silo agne rehe, hanompo amy i tragno lay masigney agne.’ Le hoe i anak’ampela’ey: ‘Tsy magnahy izay baba. Tano ty vava nanoe’o tamy i Jehovah. Faie alefaso hiharo amo o ragneko reo agnate ty roe volagne am-bohitse agne hey raho vaho izay mandeha.’ Nanompo i Jehovah tamy i tragno lay masigne a Silo agney avao i anak’ampela i Jeftay, amparake ty andro iaigna’e. Nitilike aze isan-taogne ty ragne’e.