MaIsrayeli bakaleka lubo kukomba Jehova mpawo bakatalika kukomba baleza bakubeja. Chiindi banaAmoni nibakalwana amaIsrayeli, baleza bamaIsrayeli bakubeja teebakabavuna pe. MaIsrayeli bakali mubuyumu-yumu kwaminyaka miingi. Kumamanino, bakabuzya Jehova kuti: ‘Twakubisizya. Utuvune kuli basinkondoma.’ MaIsrayeli bakanyonyoona baleza mbibakali kukomba bakubeja mpawo akasaanguna lubo kukomba Jehova. Jehova taakali kuyanda kubabona kabali mumapenzi pe.

Umwi mwaalumi wakali amanguzu wakali kutegwa Jefita, wakasalwa kuti azulwide maIsrayeli chiindi nibakali kuyanda kulwana abanaAmoni. Wakabuzya Jehova kuti: ‘Ikuti watugwasya kuzunda nkondo eeyi, ndisyomezya kukupa muntu uyoosaanguna kunditambula  kuzwa mung’anda yangu.’ Jehova wakaswiilila nkombyo yaJefita alimwi wakamugwasya kuti azunde.

Chiindi Jefita nakabweeda kung’anda yakwe, muntu wakasanguna kumutambula wakali mwanaakwe musimbi, wakazyedwe-alikke. Wakali kuzyana akuuma nsaka. Jefita wakali kuyoochita biyeni? Wakayeeya chisyomezyo chakwe, mpawo wakati: ‘Maawe, mwanaangu! Wandeetela mapenzi. Ndakasyomezya Jehova. Ikuti ndizuzikizye nzindakamusyomezya, ndeelede kukuzumizya kuti ukabelekele kutente lyakukombela lili kuShilo.’ Pesi mwanaakwe wakati: ‘Ndeende, mwakasyomezya Jehova, nkinkaako, mweelede kuzuzikizya nzimwakasyomezya. Nchindikumbila biyo, nkuti mundipe myeezi iibili kuti ndiinke kuzilundu abeenzuma. Mpawo ndiyooyinka kutente.’ Mwana musimbi waJefita wakabelekela Jehova chakusyomeka kutente kwabuumi bwakwe boonse. Munyaka amunyaka, beenzinyina bakali kumuswaya kuShilo.